„Hvernig komst hann upp með að stela 628 milljónum?“

Magnús er svo forhertur og hrokafullur að hann mætir ekki einu sinni fyrir dóm.

Katrín Baldursdóttir skrifar:

Á ég að trúa því að þessi spillti stórþjófur gangi enn þá laus? Svo virðist vera. Hann spókar sig víst á Spáni eins og fínn maður þó hann hafi stolið að minnsta kosti 628 milljónum og það bara í gegnum eitt félag. Hann átti fleiri og stal miklu meiru. Viðskiptablaðið fjallar um mál hans í dag: „Engar eignir fundist í þrotabúi félagsins Brimstone ehf., sem var í eigu Magnúsar Garðarssonar, fyrrverandi forstjóra United Silicon. Félagið var lýst gjaldþrota í maí og lauk skiptum þann 4. desember. 628 milljóna kröfum var lýst í búið sem ekkert fékkst upp í.“ Þá hafi þið það. Hvernig komst hann upp með að stela 628 milljónum? Og hver borgar þessar 628 milljónir og allar hinar milljónirnar sem hann stal? Það erum við í gegnum lífeyrissjóðina okkar og bankana. Eini fangelsisdómurinn sem Magnús fékk var skilorðsbundinn og í 4 mánuði. Ekki fyrir svik og stórfelldan þjófnað heldur fyrir umferðarlagabrot. Hugsið ykkur annað eins! Maðurinn sem stal fyrir 1500 krónur í Bónus hefur hins vegar verið dreginn fyrir dóm og á yfir höfði sér allt að 6 ára fangelsi. Svona er réttarríkið og réttlætið á Íslandi. Ömurlegt. Meðfylgjandi er frétt á RÚV frá því í sumar. Magnús er svo forhertur og hrokafullur að hann mætir ekki einu sinni fyrir dóm.