Hvor ætli hringi á undan í hinn; Eyþór Arnalds eða Dagur B. Eggertsson?
Það er svo langt á milli hugmyndafræði VG og Viðreisnar að teljast verður óhugsandi að þeir flokkar gangi saman og samstíga í fjögur ár. Það hefur svo sem ýmsu verið troðið í kok VG að undanförnu, en Viðreisn, sem óumdeilt er mesti hægri flokkur landsins, kann að verða um of. Það dregur úr möguleika á samstarfi flokkanna.
Styttra er á milli hugmyndafræði Samfylkingar og Sjálfstæðisflokks en Samfylkingar og Viðreisnar.
Viðreisn er trúlega að komast í kastþröng. Ólundin í Pawel Bartoszek, í báðum hádegisfréttatímunum, bendir til að staða hans og Viðreisnar sé ekki eins sterk og margur vill vera láta.
Það mosaík sem er verið að reyna að koma saman milli Samfylkingarinnar, Pírata, VG og Viðreisnar lofar ekki góðu.
Auðvitað er Degi annt um borgarstjórastólinn. Skárra væri það nú. Tvö ár fyrir hann og tvö fyrir Eyþór. Er það ekki lausnin?
Ágreiningur flokkanna, ef ágreining skal kalla, er um mál sem auðvelt er að ráða framúr. Dagur segir nei við uppfyllingunni í Faxaflóa, sem Eyþór þiggur með þökkum, og Eyþór segir svo nei við einhverju öðru sem Dagur verður að sleppa frá, til dæmis ytri leið Sundaganga.
Svo má ekki gleymast að borgarfulltrúar Sjálfstæðisflokksins eru ekki þeir sömu og Dagur hefur glímt við til þessa.
Fimmtán manna meirihluti Samfylkingarinnar og Sjálfstæðisflokksins er líklegasta lendingin einsog staðan er nú.
Hvor hringir á undan?
