Hvaða fyrirheit gaf ríkisstjórnin ferðaþjónustunni?

„Allir sem hafa áhuga á þjóðmálum átta sig á miklum ítökum sérhagsmuna í íslensku samfélagi og þá staðreynd að stjórnmálamenn segja eitt fyrir kosningar og gera svo allt annað og veigra sér ekki við að fara gegn augljósum vilja þjóðarinnar í stórum málum til að þjóna þröngum en valdamiklum sérhagsmunum.“

Jóhannes Þór Skúlason, framkvæmdastjóri Samtaka ferðaþjónustunnar, kallaði eftir því að ríkisstjórnin stæði við „gefin fyrirheit“ um fyrirkomulag á landamærunum og að ríkisstjórnin þyrfti að standa í lappirnar gagnvart sóttvarnalækni. Hann segir að ferðaþjónustan gæti vel lifað við einhverja útfærslu á skimunum á landamærunum og segir að sú staðreynd að Ísland sé komið á rauðan lista Sóttvarnastofnunar Evrópu yfir nýgengi smita, muni ekki breyta öllu um vinsældir Íslands sem ferðamannastaðar nú í sumar. Þetta kom fram í Vikulokunum á Rás 2 þann 31.júlí síðastliðinn. (Tilvitnun í frétt Viljans)

Sóttvarnarlæknir hefur líklega gefist upp á þrýstingi talsmanna sérhagsmuna og sett málið í hendur ríkisstjórnarinnar um næstu skref í baráttunni við faraldurinn.

Og viti menn? Ráðherrar stíga nú fram með nákvæmlega sama málflutning og rök og talsmenn ferðaþjónustunnar voru með fyrir nokkrum dögum.

Hvaða fyrirheit er Jóhannes að vísa til gagnvart ríkisstjórninni?

Allir sem hafa áhuga á þjóðmálum átta sig á miklum ítökum sérhagsmuna í íslensku samfélagi og þá staðreynd að stjórnmálamenn segja eitt fyrir kosningar og gera svo allt annað og veigra sér ekki við að fara gegn augljósum vilja þjóðarinnar í stórum málum til að þjóna þröngum en valdamiklum sérhagsmunum.

En það hljóta samt að vera þolmörk fyrir því hvað við sættum okkur við þegar líf og heilsa okkar, og okkar nánustu er í húfi.