Dagur ójafnaðar og dagur vonleysis fyrir fólkið með lægstu launin.
Gulu vestin:
Fólk stóð fyrir utan verslanir Haga í gær og dreifði flugriti þar sem vegfarendum var bent á óheyrilegan launamun hjá fyrirtækinu, en forstjórinn er með 2073% hærri laun lægst launa starfsfólkið. Það mátti heyra á fólki að því fannst þetta fáránlegur munur, skammarlegur. „Hvað gerir maðurinn við allan þennan pening?“ var algengt viðkvæði.
Fyrir utan Bónus í Smáratorgi hafði einhver spreyjað með gulu á stéttina: Jafnlaunavottun: HAGAR: 2073% launamunur. Ekki versla hér.
Á flugriti sem dreift var fyrir utan verslanir Haga mátti lesa:
Algjörlega óásættanlegt
Finnur ́Árnason, forstjóri Haga var með 70,5 m.kr. í laun í fyrra, 5.875.000,- kr. á mánuði. Hann borgar fólkinu sem vinnur á kassanum í búðum Haga 270.408 kr. á mánuði. Launamunurinn innan Haga er því 2073%. Það er algjörlega óásættanlegt.
1. mars er útborgunardagur í́ Högum. Það er dagur óréttlætis. Dagur ójafnaðar og dagur vonleysis fyrir fólkið með lægstu launin.
Styðjum fólkið á lægstu laununum í Högum og höfnum 2073% launaójöfnuði. Sendum stjórn og eigendum haga skilaboð og sleppum því́ að versla við búðir Haga 1. mars, á útborgunardaginn. Búðir Haga eru Bónus, Hagkaup, Olís, Zara og Útilíf.
Sniðgöngum Haga á útborgunardaginn, degi óréttlætis. #sniðgöngumHaga
Þessi sniðgöngudagur er sá fyrsti að nokkrum sem ráðgerðir verða. Næsta útborgunardag verður fólk aftur hvatt til að sniðganga verslanir Haga ef launastefna fyrirtækisins hefur ekki verið lagfærð. Að óbreyttri launastefnu verður haldinn annar Dagur óréttlætis við verslanir Haga mánudaginn 1. apríl.
