Hún lést stuttu eftir að hafa fengið fregnir um þungun sína
Ungt og upprennandi módel sem nýlega hafði komist að því að hún væri ófrísk, hlaut óhugnalegan dauðdaga þegar verið var að mynda hana.
10. mars síðastliðinn var örlagaríkur í lífi hinnar 19 ára Fredzania Thompson en þann dag sat hún fyrir við myndatökur en staðsetningin var fremur hættuleg eins og svo sorglega átti eftir að koma í ljós. Fredzania var búin að stilla sér upp við tvöfalda lestarteina í Navasota í Texas þegar hún kemur auga á lest frá BNSF Railway sem nálgast. Hún færir sig frá en svo hræðilega vildi hins vegar til að hún verður ekki vör við að lest frá Union Pacific nálgast úr gagnstæðri átt og lendir lestin á henni með þeim afleiðingum að unga stúlkan lét lífið.
Samkvæmt talsmanni Union Pacific, Jeff De Graff, notaði lestarstjórinn bæði neyðarbremsur og flautu til að gera viðvart um komu lestarinnar en því miður var það um seinan.
Ljósmyndarinn sem var að vinna með Thompson þennan dag slapp ómeiddur, að minnsta kosti líkamlega þó svo ósagt sé um andlega en það er án efa átakanlegt að upplifa svona hörmulega atburði. Ein af þeim allra síðustu myndum sem teknar voru af Thompson, aðeins andartökum áður en lestin kom, sýnir hana geislandi fallega og uppstillta á lestarteinunum er hún lítur í myndavélina. Þessi 19 ára fegurðardís hafði stuttu áður tekið þá ákvörðun að bíða með frekara nám til að láta reyna á feril sinn sem módel. Örfáum vikum fyrir slysið höfðu Thompson og unnusti hennar Earl Chatman komist að því að þau áttu von á sínu fyrsta barni saman.
Aðstandendur Thompson hafa stofnað GoFundMe síðu til að fjármagna útför hennar þar sem þeir biðla til samfélagsins þar sem hún bjó, til að aðstoða við útförina. Henni var lýst sem einstaklega góðri, brosmildri og umhyggjusamri stúlku sem alltaf var hægt að leita til ef eitthvað bjátaði á. Fjölskylda hennar og vinir eru algjörlega miður sín yfir örlögum hennar eins og samfélag Novasota í heild.