Sprengisandur Það verður ekki hjá því komist að segja að menntamálaráðherra er laskaður eftir þessa framgöngu og önnur mál sem á honum hafa dunið, þessi spillingarmál og hagsmunaárekstrar, sagði Páll Magnússon, fyrrverandi útvarpsstjóri í þættinum Sprengisandur á Bylgjunni í gær.
„Við sjáum að við úrlausn þessa máls núna þá er hann algjörlega vigtarlaus, það hlustar enginn á hann. Ekki í hans flokki, ekki í ríkisstjórninni. Hann fékk að vísu þennan plástur, en stefnu hans í málinu er hafnað. Forræði málsins er tekið af honum. Til að forða honum frá fullkominni niðurlægingu þá er þessir peningar settir inn á móti. Þetta var hörmungarganga undir lokin,“ sagði Páll og átti við 175 milljóna króna sérframlag.
„Ég veit, eftir áreiðanlegum heimildum, að hann var búinn að lofa að útvarpsgjaldið yrði ekki lækkað,“ sagði Ingvi Hrafn Jónsson, sem einnig var gestur þáttarins.
„Við sáum undir iljarnar á stjórrnarformanninum þegar það varð ljóst að loforðin yrðu ekki efnd. Hann bar þessi loforð frá ráðherranum inn í RÚV og inn í stjórn RÚV. Honum varð síðan ókleift að efna, hann hafði lofað þessu upp í ermina á sér, svo hann tók hatt sinn og staf og kvaddi þegar það varð ljóst að loforðin yrðiu ekki efnd,“ sagði Páll.
