Íslendingar hafa í bili endurheimt landið sitt úr „greipum“ erlendra ferðamanna.
Hjartastaður Steinunnar Sigurðardóttir verður endurútgefinn á morgun. Forlagið gefur út. Hjartastaður er mögnuð ferðasaga þar sem leiðin liggur jafnt um stórbrotna náttúru við þjóðveginn og hrjóstrugt landslag hugans.
Harpa Eir flýr úr borginni til að bjarga dóttur sinni úr hæpnum félagsskap. Með mæðgunum í för er vinkona Hörpu sem ekur bílnum og stefnan er sett á ættaróðalið fyrir austan. En ferðin snýst brátt upp í fleira en að bjarga barninu, því óafvitandi er Harpa Eir á leið til fundar við sannleikann um sjálfa sig.
Hjartastaður er endurútgefin við þær sérstöku aðstæður að Íslendingar hafa í bili endurheimt landið sitt úr „greipum“ erlendra ferðamanna. En bókin kom út fáeinum árum áður en ferðamannabylgjan reið yfir, og eru vega- og náttúrulýsingar í samræmi við friðsældina sem var glötuð og ríkir nú aftur.
Steinunn Sigurðardóttir skrifar einstakar sögur, ljóðrænar og leikandi, uppfullar af húmor og glöggskyggni, viðkvæmni og visku. Hjartastaður er ein þekktasta skáldsaga Steinunnar og hefur verið ófáanleg lengi. Guðni Elísson ritar eftirmála. Fyrir hana hlaut hún Íslensku bókmenntaverðlaunin 1995 og jafnframt var bókin tilnefnd til Evrópsku Aristeion Bókmenntaverðlaunanna og til Bókmenntaverðlauna Norðurlandaráðs.
- „Hjartastaður er bæði fyndin og sorgleg. Hún er full af fordæmalausum uppákomum.“ Dagný Kristjánsdóttir.
- „Hjartastaður er óumdeilanleg opus magnum Steinunnar Sigurðardóttur. Hver síða er vitnisburður um þann sérstaka hljóm tungumálsins sem er aðeins á færi Steinunnar að skapa.“ Kristján B. Jónasson.
- „Óviðjafnanleg léttleikandi frásagnarlist…“ Neue Zürcher Zeitung.