„Skýrt er kveðið á um niðurgreiðslur skulda borgarinnar í „meirihlutasáttmálanum“. Eftir að hann var samþykktur hafa skuldir ekki lækkað. Þvert á móti hækkuðu skuldir um 78 milljarða,“ segja borgarráðsfulltrúar Sjálfstæðisflokksins.
„Rekstrarkostnaður borgarinnar er mun hærri en hjá nágrannasveitarfélögunum og engin viðleitni hefur verið til hagræðingar hvorki til skammtíma né lengri tíma. Þessi staða og afstaða meirihlutans í borgarstjórn veit ekki á gott. Skuldir Reykjavíkurborgar hafa vaxið gríðarlega á undanförnum árum í góðærinu. Skuldahlutfall samstæðu borgarinnar hefur vaxið mjög hratt og er í árslok 2019 186% þegar allt er talið. Það eru heildarskuldir á móti heildartekjum. Heimilt er að draga ýmsar eignir frá á móti skuldum til að reikna svonefnt skuldaviðmið. En rétt er að benda á að skuldaviðmið samstæðu að Orkuveitu Reykjavíkur meðtalinni er komið í 143% í árslok 2019. Standa skuldir og skuldbindingar samstæðu í 378 milljörðum í síðasta birta uppgjöri. Þetta eru gríðarháar skuldir í lok góðæris.“
