Alþingi Helgi Hjörvar, þingflokksformaður Samfylkingarinnar, var harðorður við upphaf þingfundar fyrir skömmu. Hann talaði um vitleysisganginn á þingi en fagnaði um leið að Sigmundur Davíð Gunnlaugsson forsætisráðherra væri mættur til þingstarfa. Helgi gaf lítið fyrir verkstjórn á þinginu.
Róbert Marshall, þingflokksformaður Bjartrar framtíðar, var spyrjandi um hvort geti verið að ríkisstjórnin, sem nýtur lítils trausts, telji einu leiðina til að auka vinsældir sínar sé að samþykkja fleiri virkjanir í landinu.
Katrín Júlíusdóttir minnti á alvöruna á vinnumarkaði og ekki síst þess vegna væri tíma þingsins illa varið að deila um virkjanakosti. „Ríkisstjórnin og Alþingi geta komið með margt inn í kjaradeiluna. En menn skila auðu.“
Guðmundur Steingrímsson benti á að þegar þingmenn byrjuðu að tala hafi forsætisráðherra farið fram. „Hann er kominn aftur, velkominn.“ „Við erum óviljug þátttakendur í leikriti,“ sagði Guðmundur Steingrímsson.
Helgi Hrafn Gunnarsson sagði að þinginu færi betur að ræða kjaradeilurnar.
