Alþingi „Enginn ráðherra hefur gert grein fyrir neinni fjarvist. Það er auðvitað nærtækt að ætla að forustumenn ríkisstjórnarinnar með forsætisráðherra í broddi fylkingar hafi kosið að koma sér undan því að segja nei við aldraða og öryrkja eins og gert var hér í dag, að þeir hafi ákveðið að láta fótgönguliðana vinna það skítverk fyrir stjórnarmeirihlutann,“ sagði Helgi Hjörvar á Alþingi í gær.
„Við hljótum að undrast það hér, alþingismenn, að það sé áttatíu prósent fjarvist hjá ríkisstjórn Íslands á þingfundi við afgreiðslu fjáraukalaga 2015. Að hér séu aðeins tveir af tíu ráðherrum mættir til fundarins við afgreiðslu sjálfra fjáraukalaganna er fullkomlega óboðlegt,“ sagði Helgi Hjörvar.
„Hér vantar nokkra þingmenn, fjórir þeirra hafa tilgreindar fjarvistir hér frammi á þingfundaskrifstofu. Ég hlýt að spyrja forseta hvort það séu einhverjar skýringar á fjarveru átta af tíu ráðherrum úr ríkisstjórn Íslands sem verður til þess að sjálft fjáraukalagafrumvarpið er hér afgreitt eftir 2. umr. með minni hluta atkvæða, eða 29 atkvæðum, sem segja verður að sannarlega er enginn bragur er að? Er ríksistjórnarfundur sem haldinn er samhliða? Er einhvers konar jólafögnuður á vegum Sigmundar Davíðs Gunnlaugssonar sem hinir eru tepptir í? Eða hafa þeir tilkynnt um einhverjar fjarvistir sem ekki liggja frammi hér á skrifstofu og forseta er kunnugt um? Þá vil ég vita það.“
Einar K. Guðfinnsson, forseti Alþingis, sagði nokkra ráðherra vera með varamenn í sinn stað, vegna fjarvista sinna við skyldustörf m.a. erlendis.
