Heimilin í landinu verða af hundruðum milljónum króna vegna vaxtamunar á innlánum og útlánum. Í kjölfar stýrivaxtalækknur í nóvember lækkuðu útlán stóru viðskiptabankanna ekki eins mikið og efni standa til og innlán skila nú minni ávinningi.
Á pistli sínum á heimasíðu Verzlunarmannafélags Reykjavíkur segir Ólafía B. Rafnsdóttir, formaður VR, að stóru viðskiptabankarnir þrír hafi nú allir lækkað vexti sína í kjölfar ákvörðunar Seðlabankans um að lækka stýrivexti í byrjun nóvember og sé það gott og blessað.
Hún segir að það veki hins vegar óneitanlega athygli að innláns- og útlánsvextir taku ekki sömu breytingum. Þannig lækkuðu innlánsvextir um 0,3% stig hjá Arion banka en útlánsvextir aðeins um 0,2% stig. Hið sama er uppá teningnum hjá Landsbankanum, þar lækkuðu innlánsvextir um 0,25% stig en útlánsvextir aðeins um 0,15% stig. Íslandsbanki lækkaði vexti á innlánum sínum um 0,3% stig og útlánsvexti um 0,25% stig.
| Vaxtamunur eykst um: | |
| Arion banki | 0,10% |
| Landsbankinn | 0,10% |
| Íslandsbanki | 0,05% |
Hagfræðingur VR hefur reiknað út áhrifin af þessum breytingum og skv þeim aukast tekjur bankanna um tæplega milljarð króna vegna þessara breytinga, gróflega áætlað. Seðlabankinn áætlar að um þriðjungur inn- og útlána bankanna séu til heimilanna í landinu sem verða því af hundruðum milljóna króna.
Vextir bankanna hafa tekið breytingum þó stýrivextir Seðlabankans hafi haldist óbreyttir. Vaxtamunur Arion banka hefur til að mynda aukist um 0,20% bara á árinu 2014, hjá Landsbankanum og Íslandsbanka hefur hann aukist um 0,15%.
Ólafía segir: Við hljótum að spyrja á hvaða forsendum bankarnir tóku þessa ákvörðun? Það er erfitt að sjá að það hafi verið í þágu okkar viðskiptavinanna. Fyrirheit um aukinn kaupmátt launafólks verða að engu þegar bankarnir geta með einu pennastriki tekið ávinning vaxtalækkana til sín á þennan hátt.
