„Við höfum einfaldlega ekki komið þeim út, m.a. vegna þess að það hafa ekki verið til lóðir, það hefur verið úthlutað lóðum sem ekki eru til, eiga að fara í skipulag eftir fimm ár, á Veðurstofureitnum eða á Hringbrautarstokknum, svo dæmi sé tekið.“
Sigurður Ingi Jóhannsson.
„En það er alveg rétt hjá háttvirtum þingmanni að við munum ekki byggja 1.200 íbúðir á árinu 2023 eða 2024. Við höfum verið að setja upp sviðsmyndir sem byggja á því hvað sé raunverulega hægt. Þessi markmið um 4.000 íbúðir og allt að 35% íbúða, þ.e. 30% sem eru þá byggðar sem almennar íbúðir eða með hlutdeildarlánum og svo 5% að auki í félagslega kerfinu sem gerir um 1.400 íbúðir — við sjáum ekki fram á að við náum þessu að fullu fyrr en kannski 2026 eða 2027,“ sagði Sigurður Ingi Jóhannsson á Alþingi í gær.
Þingmaðurinn sem hann vitnaði til er Jóhann Páll Jóhannsson Samfylkingu.
„Mér heyrist hæstvirtur innviðaráðherra strax vera búinn að gefast upp á rammasamkomulagi ríkis og sveitarfélaga um aukið framboð af húsnæði. Þar er gert ráð fyrir 1.200 almennum íbúðum á ári næstu árin. Ef við berum rammasamninginn saman við skýrslu starfshóps um umbætur á húsnæðismarkaði þá leggur sá starfshópur mjög þunga áherslu á að þessi uppbygging verði að langmestu leyti í almenna íbúðakerfinu. Ef það eiga bara að rísa 700 íbúðir á ári þegar best lætur í almenna íbúðakerfinu er ríkisstjórnin í rauninni að senda þau skilaboð til sveitarfélaga og til uppbyggingaraðila að þau hafi heldur enga trú á þessu 4.000 íbúða markmiði sem lagt er upp með í rammasamkomulaginu og íbúðirnar þurfi að vera talsvert færri til að uppfylla þessa 30% hlutdeild, ég fæ alla vega ekki skilið þetta öðruvísi. Þetta held ég að séu mjög skaðleg skilaboð til sveitarfélaga og til uppbyggingaraðila og til aðila vinnumarkaðarins.“
„Samfylkingin hefur oft gagnrýnt okkur fyrir að það vanti peninga í stofnframlögin. Það hefur ekki verið vandamál á undanförnum árum. Við höfum einfaldlega ekki komið þeim út, m.a. vegna þess að það hafa ekki verið til lóðir, það hefur verið úthlutað lóðum sem ekki eru til, eiga að fara í skipulag eftir fimm ár, á Veðurstofureitnum eða á Hringbrautarstokknum, svo dæmi sé tekið,“ sagði Sigurður Ingi.
