Sjávarútvegur Sigurður Ingi Jóhannsson, sjávarútvegs- og landbúnaðarráðherra, hefur skrifað undir viljayfirlýsingu, með landbúnaðar- og sjávarútvegsráðherra Portúgals, Assunção Cristas, þess efnis að tryggt verði að ekki sé fluttur út saltfiskur til Portúgals sem meðhöndlaður hefur verið með fosfötum í verkuninni, nema kaupandi óski þess sérstaklega.
Forsagan er sú, að frá síðustu áramótum leyfa reglur Evrópusambandsins að notuð séu tví- og fjölfosföt við verkun saltfisks, en þessi efni verja fiskinn fyrir ákveðnum efnahvörfum og halda honum hvítum.Portúgalar hafa hins vegar mjög ríka hefð fyrir neyslu á saltfiski, sem verkaður er á hefðbundinn hátt. Stjórnvöld í Portúgal leituðu til ráðuneytisins í vetur og óskuðu eindregið eftir samstarfi um að tryggja áframhaldandi viðskipti með saltfisk, sem verkaður er án fosfatsprautunar.
Portúgal er mikilvægur markaður fyrir íslenskan saltfisk, og því ákvað ráðherra eftir samráð við saltfiskframleiðendur að ganga frá umræddri viljayfirlýsingu.
