Alþingi „Ef hann væri í ríkisstjórn og stæði frammi fyrir því að grundvallaratvinnugreinar í landinu gætu verið að horfa upp á hluti sem tæki langan tíma að bæta, að fullt af launþegum í landinu mundi jafnvel missa vinnuna og lífsviðurværi sitt í tengslum við slíkt, í ferðaþjónustu, í sjávarútvegi og víðar, mundi hann sitja hjá? Mundi hann bara bíða rólegur og sitja hjá? Á sama tíma og báðir deiluaðilar segja að ekkert sé að gerast og engin von á samningi, á sama tíma og ríkissáttasemjari segir að það sé fullreynt, mundi hv. þingmaður bara sitja hjá og bíða eða hvað mundi hann gera? Mundi hann kannski gera nákvæmlega það sama og hann gerði árið 2010, og talaði þá ekki um pólitíska atburðarás sem yrði að stöðva, sem var að samþykkja lög til að stöðva verkfallsaðgerðir flugvirkja?“ Þetta sagði Hanna Birna Kristjánsdóttir innanríkisráðherra á Alþingi í dag þegar hún svaraði Helga Hjörvar. Helgi hafði skömmu áður gert lagasetningu, til að stöðva vinnudeilu á Herjólfi, að umalsefni. Helgi sagði meðal annars:
„Getur ráðherrann fallist á að lögin á Herjólf hafi verið fljótræði og hafi skapað ríkisstjórninni þetta sjálfskaparvíti sem við höfum verið með í fanginu í vor sem eru alvarlegar deilur í kjarasamningum á sviði samgöngumála?“
Og örn síðar. „En það er alveg jafn dagljóst að það voru engir stórfelldir efnahagslegir hagsmunir fyrir því að beita hásetana á Herjólfi því ofbeldi sem þeir voru beittir fyrr í vetur og að það hafi skapað mjög óheppilegar væntingar atvinnurekenda um að þeir þyrftu ekki að ganga eins langt og þyrfti til að loka kjarasamningum vegna þess að ef menn næðu ekki saman mundi Alþingi koma saman og afgreiða fyrir þá lög sem losuðu þá við óþægindi sem af kjaradeilum kynni að stafa. Getur hæstvirtur innanríkisráðherra, í ljósi þess sem gerst hefur síðan lögin voru sett á Herjólf, viðurkennt að sú lagasetning hafi verið mistök hvað sem þessu frumvarpi líður?“
