Katrín Baldursdóttir skrifar:
Nú þarf að byrja að hlera símann hans Kristjáns Þórs Júlíussonar sjávarútvegsráðherra. Tengsl hans við helsta glæpafyrirtæki landsins Samherja er orðið svo yfirgengilega áberandi að það væri bara í svæsnustu sakamálasögum sem hægt væri að finna slík dæmi. Kristján er meðsekur með öllum glæpum Samherja og ábyrgur fyrir því að fyrirtækið getur stolið endalaust og botnlaust arðinum af auðlindum þjóðarinnar. Í siðuðu ríki væri búið að dæma hann fyrir landráð og spillingu af verstu gerð. En hann leikur lausum hala og finnst ekkert mál að læka færslur sem sýna Þorsteini Má og Samherja stuðning.
Svo hringir hann bara í þessa glæpamenn og mætir með þeim á fundi þar sem verið er að brugga launráð um risaþjófnað á auðlindum fátækra landa. Þar sem ráðherrum er mútað, peningarnir streyma inn á reikninga í skattaskjólum og allt fer uppí loft hjá útlendum bönkum. Kristján getur bara lækað og hringt í þessa gæja sem hafa stöðu sakborninga. Hringt og sagt það sem honum sýnist. Hann kemst upp með allt. Og lækað þar sem honum sýnist. Hann kemst upp með allt. Enda kostaður af þessum glæpamönnum sem stjórna landinu. Hugsið ykkur það eru þessir glæpamenn sem leynt og ljóst stjórna öllum stóru málunum á Íslandi.