Handlangarar fjármagnsbraskara

Fyrrvernadi heilbrigðisráðherrann, Ögmundur Jónasson, skrifar á heimasíðu sína um heilbrigðismál og einkum einkarekstur þess og arðgreiðslur. Sem hann finnur mikið að.

Í lok greinarinnar brýnir núverandi heibrigðisráðherra til verka.

„Kemur nú að hlut Óttarrs Proppé heilbrigðisráðherra. Ætlar hann virkilega að láta fjármálabraskara og handlangara þeirra á Alþingi nota sig til óþurftarverka á kostnað almennings, en nákvæmlega það gerir hann með aðgerðarleysi sínu. Slíkt væri fullkomið ábyrgðarleysi.

Við bíðum þess nú að heilbrigðisráðherra  lýsi því afdráttarlaust yfir að engin einkavæðing á forsendum arðsemissjónarmiða verði heimiluð, Klíníkinni sagt að hún fái ekki krónu úr vasa skattgreiðenda á þeim forsendum sem hún krefst.
Ef lagabreytinga þykir vera þörf til þess að verja kerfið ásókn, þá verði ráðist í þær þegar í stað og ef varðstöðumenn fjármagnsins, samstarfsmenn Óttarrrs á þingi, skirrast við, þá verði stjórnarsamstarfinu slitið þegar í stað. Almannahagur er í húfi.“

Á öðrum stað í grein Ögmundar má lesa þetta: „Samið hefur verið við einkapraxísinn á ríflegri nótum en almannareksturinn og síðan hafa fjárfestar komið til sögunnar, litið á ríkisreknar lækningar sem arðvænlegan fjárfestingarkost til þess að hagnast á.
Og ríkið hefur dansað með. Eða hvers vegna skyldu eigendur Klíníkurinnar geta selt hluti sína fyrir tugi og hundruð milljóna nema fyrir þær sakir að þarna sé um að ræða verðandi ríkisrekna gullgerðarvél? Og tryggingin fyrir slíku? Bjarni Benediktsson og félagar í Stjórnarráði Íslands!
Getur niðurlægingin orðið meiri fyrir íslensk stjórnmál þegar hagsmunagæsla fyrir einkabrask er rekin eins opinskátt og við erum nú að verða vitni að? Varla.“

Hér er síðan greinin öll.

-sme