Framsóknarmennirnir, Jón Kristjánsson og Jón Sigurðsson, sögðu í þætti á Hringbraut, að Halldór heitinn Ásgrímsson hafi verið andsnúinn að lýsa yfir velvild Íslands vegna innárásarinnar í Írak. Þeir sögðu Davíð Oddsson, þáverandi forsætisráðherra hafa einn viljað styðja árásina.
Halldór hafi hins vegar staðið frammi fyrir orðnum hlut og ákveðið að standa að baki Davíðs í þessu erfiða máli. Halldór var hart gagnrýndur innan síns flokks en þeir sögðu hann hvergi hafa kvikað í stuðningi við Davíð Oddsson.
Í þættinum, sem átti að vera um pólitískan feril Halldórs, vegna nýútkominnar bókar Guðjóns Friðrikssonar um Halldór, komust þeir nafnarnir lítt áfram.
Halldór var merkur stjórnmálamaður. Sat á Alþingi í nærri þrjátíu ár og var sjávarútvegsráðherra 1983–1991 og samstarfsráðherra um norræn málefni 1985–1987, dóms- og kirkjumálaráðherra 1988–1989, samstarfsráðherra Norðurlanda 1995–1999, utanríkisráðherra 1995–2004, forsætisráðherra 2004–2006.
Halldór var sá sjávarútvegsráðherra sem innleiddi kvótakerfið. Þetta vita nú flestir. Halldór var formaður Framsóknarflokksins í þrettán ár og þar áður varaformaður í álíka mörg ár. Í formannstíð Halldórs beygði hann flokkinn mikið til hægri og Framsókn varð hægrisinnaður Evrópuflokkur. Halldór var mikið í mun að við sæktum um aðild að Evrópubandalaginu.
Halldór var oft þurr á manninn. Mig langar að segja sögu sem sýnir að Halldór gat verið hinn skemmtilegasti. Svo bar við að Skipstjóra- og stýrimannafélagið Aldan stó á einhverjum tímamótum og blés til fagnaðar í Súlnasal Hótel Sögu. Ég var veislustjóri og Halldór var heiðursgestur og ræðumaður kvöldsins. Halldór fór á kostum. Ég man enn eina söguna sem hann sagði. Hún var nánast svona:
Það voru tveir karlar, í einhverri byggð á Austurlandi, sem ég man ekki hver var, sem bjuggu hlið ið hlið. Og höfðu gert í áraraðir. Það var kalt á milli þeirra. Óvinskapur. Svo kom að því að annar þeirra átti stórfmæli innan skamms. Sá siður var í byggðinni að það var flaggað þegar einhver átti stórafmæli. Hinn nágranninn var ekki með flaggstöng við sitt hús. Hann birtist í kaupfélaginu. Hann pantaði flaggstöng og lagði áherslu á að hún yrði komin fyrir ákveðin dag. Sem var einmitt afmælisdagur nágrannans. Þetta spurðist um allt og fólki þótti gott að vita að hann legði þetta á sig til að flagga af tilefni afmælisins í næsta húsi.
Jæja, flaggstöng kom og stóri dagurinn rann upp. Það var flaggað við hvert hís. Nema eitt. Sá hafði fengið flaggstöng til að flagga ekki.
