„Miðflokkurinn stundar nú málþóf á þingi og talar við sjálfan sig klukkutímunum saman.“
Engir kærleikar eru milli Miðflokks og Framsóknar. Eðlilega. Skilnaðurinn var sár.
Ágúst Bjarni Garðarsson, bæjarfulltrúi Framsóknar í Hafnarfirði, sá leið til að skjóta að fjandvininum í Miðflokki:
„Miðflokkurinn stundar nú málþóf á þingi og talar við sjálfan sig klukkutímunum saman. Markmiðin virðast skýr; koma í veg fyrir einhverjar mestu uppbyggingu, og flýtingu mjög brýnna og stórra samgönguframkvæmda um land allt, svo lengi sem elstu menn muna. Einnig að koma í veg fyrir þá fjölgun starfa sem af þeim framkvæmdum munu hljótast. Allt virðist þetta vera gert til að koma í veg fyrir að íbúar og ferðamenn þessa lands búi við sama umferðaröryggi og tíðkast í þeim löndum sem við gjarnan berum okkur saman við. Vonandi sjá þessir ágætu þingmenn að sér, en það verður að teljast ólíklegt. Hafi þeir skömm fyrir.“
Víst er að fleiri skeytasendingar eiga eftir að ganga milli liðsmanna Framsóknar og Miðflokks.
