Það var einfaldlega ekki hægt að sitja undir þeirri forystu, sem þar var og er, segir Gunnar Bragi.
Gunnar Bragi Sveinsson verður ekki í framboði í haust. Hann er hættur. Í viðtali í Mogganum kemur fram að sárin sem opnuðust þegar hann varð undir í Framsókn og fór yfir til Sigmundar Davíðs og Miðflokksins hafa ekki gróið. Hann segir núverandi foryustu Framsóknar vera þannig að ekki sé starfandi undir henni:
„Auðvitað er fólk í báðum flokkum, sem getur talað saman og myndað traust, en það er ekki almennt. Það var erfitt fyrir okkur mörg að stíga þetta skref, en ég sé ekki eftir því. Það var óhjákvæmilegt. Það var einfaldlega ekki hægt að sitja undir þeirri forystu, sem þar var og er. Það getur vel verið að við getum unnið með þessu ágæta fólki, en við getum ekki verið saman í flokki,“ segir Gunnar Bragi.
Honum þótt illa með sig farið þegar Ásmundur Einar Daðason var valinn í fyrsta sæti Framsóknar og sér ýtt til hliðar:
„Og það eru auðvitað særindi, eðlilega, þegar það eru undirmál og óheilindi, eins og voru í Framsókn á þessum tíma. Það hjálpar ekki heldur þegar maður sér að þeir sem mest og verst höfðu sig í frammi með óheilindum þá, eru núna að reyna að lappa upp á ímyndina með því að fara í viðtöl og tala um æskuna eða annað slíkt til þess að breiða yfir sína framgöngu í stjórnmálum.“
Ekkert er rætt um Klaustursmálið í viðtalinu.
