Mikið er það nú gott að Samherjarnir hafa af fullri kurteisi opnað á samskipti við refsivaldið. Héraðssaksóknara og skattrannsóknarstjóra. Björgólfur Jóhannsson afleysingaforstjóri Samherja tilkynnir þetta. Samherjarnir eru aldeilis auðmjúkir allir saman. Hafi þeir þökk fyrir.
Mörgum þykir sem lítið hafi gerst í Samherjamálinu. Nú er þó vitað hvers vegna. Refsivaldið beið og beið og beið eftir að Samherjarnir opnuðu á samskiptin. Nú hefur það verið gert.
Sinn er siðurinn í landi hverju. Í Namibíu virðist tíðkast hinn mesti dónaskapur. Refsivaldið þar bíður ekki eftir að vera boðið í samtal. Fangelsar menn og frystir eignir þeirra. Ekkert íslenskt við það.
Samherjaflokkurinn á Alþingi, ætlaði að skrifa Sjálfstæðisflokkurinn, leggur mikla áherslu að þingmenn eigi ekki að tala um Samherjamálið. Alþingi sé ekki dómstóll og eigi því að ekki að fjalla um ódæmd mál. Merkilegt nokk. Best að vera ekki með leiðindi á þessum merka degi í sögu réttvísinnar. Daginn sem Samherji opnar á samskipti við refsivaldið.