„Því miður þarf að bíða aðeins með réttlætið fyrir þig,“ er viðkvæðið.
Ríkisstjórnin kann sér ekki kæti og birtir hróðug niðurstöðu OECD. Sjá sýnishorn:
„Íslenskt efnahagsumhverfi er heilbrigt, jöfnuður óvíða meiri og staða ríkissjóðs traust. Þetta kemur fram í nýrri skýrslu Efnahags- og framfarastofnunarinnar (OECD) um Ísland, sem birt var í dag. Skýrslur af þessu tagi eru gefnar út á tveggja ára fresti. Angel Gurría, framkvæmdastjóri OECD, kynnti helstu niðurstöður skýrslunnar á blaðamannafundi ásamt Bjarna Benediktssyni, fjármála- og efnahagsráðherra og Lilju D. Alfreðsdóttur, mennta- og menningarmálaráðherra. Að þessu sinni var auk venjubundinnar umfjöllunar um íslensk efnahagsmál sérstaklega fjallað um útgjöld ríkissjóðs og menntamál.“
Var fólk spurt. Birti hér greiðsluseðil, þar sem fram kemur að nettó greiðsla TR til öryrkja er aðeins rúmar 65.000 krónur. Aðrar greiðslur koma frá lífeyrissjóðum sem öryrkinn hefur sjálfur safnað á löngum tíma. Samtals rúmar 244.000 krónur á mánuði.
Nánast er meiðandi að lesa sjálfshól ríkisstjórnarinnar. Margt fólk veit betur.
Síðasta ræða Katrínar Jakobsdóttur sem stjórnarandstæðings gaf fólki vonir. Lesum:
„Stjórnvöld eiga ekki að biðja fátækt fólk á Íslandi að bíða eftir réttlæti. Núverandi áætlanir þeirrar ríkisstjórnar sem nú situr gera ráð fyrir því að öryrkjar og aldraðir eigi að halda áfram að hokra og búa við skammarleg kjör. Það á að bjóða atvinnulausu fólki með fullan bótarétt upp á 217.000 kr. á mánuði. Lægstu laun á Íslandi standa enn í 280.000 kr. Þau duga ekki til framfærslu. Og fólk á lægstu launum er beðið að vera þakklátt fyrir 20.000 kr. því að hlutfallslega sé það nú ekki lítið. „Því miður þarf að bíða aðeins með réttlætið fyrir þig,“ er viðkvæðið, „en allt stendur þetta til bóta.“ Þegar þetta fátæka fólk er beðið um að bíða eftir réttlætinu er verið að neita því um réttlæti.“
