Glúmur er genginn í Framsókn eftir svik Ingu Sæland: „Ég bið hæstvirta kjósendur um að örvænta ekki“

Glúmur Baldvinsson fullyrðir að Inga Sæland, formaður Flokks fólksins, hafi svikið sig um að verða borgarstjórnarefni flokksins í sveitarstjórnarkosninunum. Með því segir hann Reykvíkinga hafa misst af besta borgarstjóra aldarinnar.

Glúmur segir að þeim Ingu hafi orðið gott til vina í síðustu þingkosningum en nú virðist hafa slitnað á milli þeirra, ef marka má færslu Glúms á Facebook. Hann segir að Ingu hafi í fyrstu litist mjög vel á á hafa sig í oddvitasætinu en svo hafi hún hætt að svara í símann.

„Ég og frú Sæland urðum vinir í síðustu alþingiskosningum. Ég taldi nauðsynlegt fyrir Reykvíkinga að ég kæmist í borgarstjórn og ræddum við Inga þá hugmynd að ég yrði í einu efsta sæta flokksins í vor. Hún var afar jákvæð um hugmyndina.

Við afréðum að hittast snemma í febrúar og að ég hefði samband til að negla fund. Svo hafði ég samband en ekkert svar. Og svo aftur og aftur en aldrei svar. Lexían er sú að það er ekkert að marka Ingu Sæland og það sem verra er að Reykvíkingar misstu þar með af hefði orðið besti borgarstjóri aldarinnar.

En ég bið hæstvirta kjósendur um að örvænta ekki. Því koma tímar koma ráð. Og ég genginn í Framsókn.“