Gísli Einarsson, ritstjóri Landans, þvertekkur fyrir að nýleg umfjöllun þáttarins um Reyka-viskí hafi verið áfengisauglýsing. Hafi hann hins vegar brotið lög með umfjölluninni verði bara að hafa það, segir Gísli.
Í samtali við Vísi segir Gísli umfjöllunina hafa verið um nýsköpunina en ekki áfengið sjálft.
„Þetta er nýsköpun. Við höfum fjallað um áfengisframleiðslu nokkrum sinnum í þættinum og ekki hafa verið gerðar neinar sérstakar athugasemdir við það. Við erum ekki að fjalla um áfengið sem slíkt heldur eingöngu út frá nýsköpun. Við fjölluðum um Flóka-viskí, sem framleitt er í Reykjavík, nú síðast fjölluðum við um það þegar var verið að brugga jólabjór úr rauðkáli og grænum baunum, okkur fannst það forvitnilegt,“ segir Gísli og heldur áfram:
„En þetta er ekki áfengisauglýsing. Mér sýnist menn nú vera sullandi með rauðvín í hinum og þessum þáttum án þess að fjalla sérstaklega um hvernig það er til komið. Það bara hvarflaði ekki að mér að það væri eitthvað athugavert við þetta, ekki fremur en að fjalla um snakk með ostabræðslu. Matvælaframleiðslu. Ef við höfum brotið lög þá er það bara þannig. En þetta er ekki einbeittur brotavilji. Ég lít á þetta sem áhugaverða framleiðslu og nýsköpun. Íslenska vatnið og skoska viskíið.“
Hér má finna hinn umdeilda þátt Landans.