„Það er áhyggjuefni að gengi íslensku krónunnar hefur lítillega gefið eftir. Það getur skapað, ef áfram heldur, verðbólguþrýsting,“ sagði fjármálaráðherrann Bjarni Benediktsson.
Guðmundur Ingi Kristinsson, Flokki fólksins, sagði skömmu áður:
„Ef við segjum það á mannamáli, um hvað erum við þá að tala? Tökum 20 millj. kr. íbúðalán og hvernig staðan á því var fyrir rétt tæpum tveimur mánuðum síðan. Vísitala neysluverðs til verðtryggingar var 469,8. Tæpum tveimur mánuðum seinna var hún 475,2. Hvað þýðir það á mannamáli? Ég skal segja ykkur það. 250.000 kr. hækkun á þessu tímabili, 250.000 kr. hækkun á 20 millj. kr. láni. Þetta þýðir að ef þetta heldur svona áfram verður milljón króna hækkun á árinu. Ætlar ríkisstjórnin að gera það sama og hún gerði í hruninu? Tíu, tuttugu, hversu mörg heimili eiga blæða fyrir verðbólguna?“
Bjarni sagði þetta rétt hjá Guðmundi Inga. „En lausnirnar við þessu finnst mér vera heldur fátæklegar, þ.e. að kippa einfaldlega öllum tengingum við verðbólguna úr sambandi án þess að það sé rætt hvað það þýðir í stærra samhengi hlutanna, t.d. fyrir framboð af lánsfé til lengri tíma, jafnvel til skamms tíma.“
