Gagnbyltingin: Sturlaður veruleiki

Hörður Ægisson, einn helsti innanbúðarmaður Fréttablaðsins, skrifar leiðara þess í dag. Hann herjar á forystu verkafólks og kröfugerðar þeirra lægstlaunuðu. Hann segir um kröfugerðirnar:

„Þeim verður ekki lýst öðruvísi en sem sturluðum og í engum takti við efnahagslegan veruleika. Fyrir atvinnurekendur – og íslensk stjórnvöld – er þess vegna augljóst að við þeim kröfum verður aldrei hægt að verða. Ekki er að sjá hvernig bilið milli viðsemjenda verður brúað á komandi vikum og mánuðum. Afleiðingin er áframhaldandi óvissa fyrir íslenskt efnahagslíf og þrýstingur á gengi krónunnar.“

Enn minnkar „svigrúmið“, orðið minna en ekkert

Hörður, sem er þeim duglegustu í gagnbyltingunni tekur undir með öðrum í sömu hlutverkum, það er um að kröfugerðirnar felli gengi krónunnar og um leið staðfestir hann að heildsalar, kaupmenn og framleiðendur hafa í skjóli gagnbyltingarinnar, hækkað verð á vöru og þjónustu. Hörður skrifar:

„Afkoma flestra fyrirtækja hefur á sama tíma versnað til muna og eru þau nú í vaxandi mæli farin að grípa til uppsagna og verðhækkana. Sú þróun er rétt hafin og svigrúm til almennra launahækkana er af þeim sökum minna en ekki neitt.“

Vilja launahækkun án innistæðu

„Forystumenn stærstu verkalýðsfélaga landsins, sem öllum má nú vera ljóst að eru stærsta einstaka ógnin gagnvart lífskjörum meginþorra íslensks launafólks á komandi árum, eru á öðru máli. Þeir vilja tefla á tæpasta vað og innleysa tugprósenta launahækkanir, sem engin innistæða er fyrir, á einu bretti. Flestir vita hvaða afleiðingar það mun hafa. Gengið mun hríðfalla, verðbólgan hækka upp úr öllu valdi og Seðlabankanum verður nauðugur sá einn kostur að bregðast við með hækkun vaxta. Allir munu tapa,“ skrifar Hörður Ægisson í blað sitt í dag.

(Talað hefur verið um breytingarnar í verkalýðshreyfingunni sé einskonar bylting. Barátta fólksins í Borgartúni 35, Hádegismóum og Fréttablaðinu sem víðar verður að sama skapi að kallast gagnbylting.)