Yfirlýsing: Smábátafélagið Hrollaugur, Höfn í Hornafirði
Í þessu dæmalausa ástandi þar sem margir einstaklingar og fjölskyldur, mörg fyrirtæki um allt land eru hjálpar þurfi þarf að grípa í öll hálmstrá til að létta öllum róðurinn. Við tökum því undir með Landssambandi smábátaeigenda og teljum að strandveiðar skuli hefjast strax. Hjálpum hundruðum blóma að spretta allt í kringum landið í stað örfárra. Eflum strandveiðar svo um munar. 60 veiðidaga á ári, allt árið um kring. Blómstrandi smábátaútgerð er ein mikilvægasta lífæð sjávarbyggða hjá fiskveiðiþjóðum í heiminum og hjá okkur líka. Til þess að þetta geti gengið eftir þurfum við mannsæmandi aðgang að okkar eigin auðlindum. Gerum það núna.
Bíðum ekki eftir að ástandið verði enn verra. Þetta er ríkinu útgjaldalaust, þvert á móti fær ríkissjóður tekjuskatt og aðrar greiðslur í tengslum við atvinnugreinina.
Sjávarútvegsráðherra ætlar þess í stað að auðvelda stórútgerð kvótatilfærslur milli ára.
Smábátafélagið Hrollaugur á Höfn í Hornafirði vill því koma þessari ábendingu til þingheims, sérstaklega þingmönnum sem sitja í efnahags- og viðskiptanefnd og atvinnuveganefnd. Fjárlaganefnd þarf vart að koma að málum enda enginn kostnaðarauki sem þarf til að hrinda þessu í framkvæmd.
Það sem þarf að koma inn í efnahags- og atvinnumálapakka ríkisstjórnarinnar: Frjálsar strandveiðar hefjist strax. Þar verða strax til um 6-1200 störf, (sumir eru tveir á bát) afleiddar tekjur til tryggingafélaga, afleidd störf á fiskmörkuðum, í vinnslu, frystingu, vélsmiðjum, veiðarfæragerðum, greiðslur af starfseminni til ríkissjóðs o.fl.
Sjávarútvegsráðherra ætlar þess í stað að auðvelda stórútgerð kvótatilfærslur milli ára. Það hjálpar okkur ekkert núna. Það væri hagkvæmara að láta litlar og meðalstórar útgerðir njóta kvótans á þessu ári. Og leyfa þeim að veiða meira á árinu, Það er alltaf heillavænlegra að veiða úthlutuðum kvóta innan sama kvótaárs.
Aprílmánuður í frjálsum handfæraveiðum þar til strandveiðitímabilið hefst. Í þessum fordæmalausu aðstæðum þarf að tryggja handfæraveiðarnar og gera þær frjálsar, miðað við 4 rúllur á bát. Þetta gerir ekkert nema gott og ríkið fær sitt út úr þessu,
Ferskfiskmarkaðurinn dróst töluvert saman á Evrópumörkuðum í kjölfar Covid-19 faraldursins en á móti kemur að það er stökkbreyting í sölu a frystum fiski. Ferskfiskmarkaður í Asíu er að skríða saman eftir að þar var botnfrosið í um 6 vikur.
Þetta er fljótt að breytast. Markaður með sjávarfang er ekki, hefur aldrei verið og mun aldrei verða stöðugur, hvorki hér heima né á alheimsmarkaði. Handfæraveiðar og vinnslustöðvar eiga auðveldara með að aðlagað sig þessari breyttu heimsmynd en stærri útgerðum.
Gerum þetta strax. Gerum þetta saman. Gerum þetta núna.
F.h. Smábátafélagsins Hrollaugs, Höfn í Hornafirði
Vigfús Ásbjörnsson.