Stjórnmál „Sérstök ástæða er til að fagna þegar félagshyggjuöfl ná saman um slík málefni því það gefur tilefni til bjartsýni varðandi frekari samvinnu vinstrimanna á öðrum vettvangi,“ þannig endar Katrín Jakobsdóttir, formaður Vinstri græna, grein sína í Fréttablaðinu í dag, þar sem hún fjallar um nýafstaðnar kosningar, útkomu VG og áherslur flokksins á komandi tímum.
Fyrir rúmri viku var Árni Páll Árnason, formaður Samfylkingarinnar, gestur í þættinum Sprengisandur á Bylgjunni, og var hann spurður um tilvist Bjartrar framtíðar og hvort hann sjái fyrir sér sameiningu flokka á vinstri væng. Hann sagði Samfylkinguna opna fyrir þeim sem eru sammála stefnu flokksins.
„Samfylkingin býðir velkomið allt alþjóðasinnað frjálslynt fólk. Það er rúm fyrir það í okkar röðum, en ef það kýs að hasla sér völl annarsstaðar, þá er það þeirra val. Á móti kemur hinsvegar að hugmyndin um að það sé betra að vera í fleiri flokkum, bara til að hlutirnir séu einfaldari og þægilegri, þá er ég þeirrar skoðunar að hún sé ekki góð,“ sagði Árni Páll.
„Miklu skiptir líka hvernig fólk sem telur sig til félagshyggjufólks velur að vinna í stjórnmálunum og því er ástæða til að óska Reykvíkingum til hamingju með nýjan borgarstjórnarmeirihluta. Þar sameinast frjálslynt og félagshyggjusinnað fólk með breiða skírskotun og sterkt umboð kjósenda. Hver flokkur hefur að sjálfsögðu sína sérstöðu en um margt erum við sammála,“ skrifar Katrín Jakobsdóttir í Fréttablaðið í dag.
