Fréttaskýring: Sigurjón M. Egilsson

„Við höfum stigið stórt skref, framsóknarmenn, með samþykkt þessarar tillögu,“ sagði Sigfús Karlsson, fundarstjóri þegar búið var að afgreiða ályktunina. Umræður um Evrópumálin stóðu í fjórar klukkustundir á flokksþinginu og yfir 40 manns tóku til máls.

Ályktun um að Ísland eigi að hefja aðildarviðræður við Evrópusambandið var samþykkt með miklum meirihluta atkvæða á flokksþingi Framsóknarflokksins.. Áður hafði verið hafnað tillögu um að flokksþingið leggist eindregið gegn öllum hugmyndum um að Ísland gangi í Evrópusambandið.

Þetta er úr frétt af flokksþingi Framsóknarflokksins árið 2009, fyrir aðeins fimm árum. Skoðum þetta ögn betur. Í þessari sömu frétt segir einnig: „Þá setur flokkurinn það skilyrði, að í upphafi viðræðna verði gerður stöðugleikasamningur við Evrópska seðlabankann sem tryggi stöðugt gengi íslensku krónunnar þar til Íslendingar taka upp evru. Tekið verði tillit til stöðu íslensks efnahagslífs við umbreytingu peninga- og gjaldeyrismála á Íslandi.“

Fyrir aðeins fimm árum samþykkti flokksþing Framsóknarflokksins eftirfarandi: „..að í upphafi viðræðna verði gerður stöðugleikasamningur við Evrópska seðlabankann sem tryggi stöðugt gengi íslensku krónunnar þar til Íslendingar taka upp evru.“

Verðum í Evrópusambandinu árið 2015

Ef við lítum ögn lengra til baka fer ekki á milli mála að Framsóknarflokkurinn var með mjög ákveðna afstöðu til Evrópusambandsins, flokkurinn stefndi þangað. Það var ekki síst undir forystu Halldórs Ásgrímssonar sem flokkurinn sigldi hraðbyri til austurs, til Evrópu. Hann var kappsamur í málinu og lét sitt ekki eftir liggja. Þegar Halldór var forsætisráðherra steig hann í pontu á ársfundi Viðskiptráðs og gerðist spámaður. Lesum hluta af átta ára gamalli ræðu þáverandi forsætisráðherra:

„Ég spái því reyndar að við verðum orðnir aðilar að Evrópusambandinu árið 2015. Ég tel að það sem verði einkum ráðandi í umræðu um það á næstunni sé framtíð og stærð evrópskra myntbandalagsins. Ákvarðanir Dana, Svía og Breta hafa þar veruleg áhrif. Það eru hins vegar engar pólitískar forsendur fyrir ákvörðun nú af okkar hálfu. Til þess er umræðan ekki nægilega þroskuð. Forsenda þess að málið þroskist betur er að atvinnulífið láti það til sín taka með mun virkari hætti. Ég hef alltaf undrast litla umræðu atvinnulífsins um Evrópumálin. Launþegahreyfingin hefur einhverra hluta vegna staðið fyrir meiri umræðu. Hvað veldur veit ég ekki. Hitt finnst mér augljóst að því verður ekki frestað lengi, hvorki í atvinnulífinu né á vettvangi stjórnmálanna. Það á ef til vill við í þessu máli líkt og í flestum öðrum stórum málum að þótt við vitum hvað verður þá sé það ekki líklegt til vinsælda. Óttinn við að rugga bátnum sé of mikill. Þegar ekkert kallar á skjóta niðurstöðu og vel gengur er oft þægilegra að fresta því,“ að sögn Halldórs.

Sigurður Ingi Jóhannsson, þingmaður Framsóknarflokksins í Suðurkjördæmi og nú varaformaður Framsóknarflokksins og atvinnuvega – og umhverfisráðherra, sagði á fundi sem Heimssýn, hreyfing sjálfstæðissinna í Evrópumálum, hélt í Þingborg í maí 2009, þegar verið var að ræða þingsályktunartillögu þáverandi ríkisstjórnar að sækja um aðild að Evrópusambandinu, að hann muni tillögu um aðildarumsókn ef hún er á grundvelli flokkssamþykktar Framsóknarflokksins frá flokksþinginu í janúar.“

Evrópa fyrir okkur öll
„Framsóknarflokkurinn er eini flokkurinn sem hefur markað sér skýra stefnu fyrir aðildarviðræður við Evrópusambandið og skilgreint samningsmarkið þeirra viðræðna. Framsókn hefur sett það sem skilyrði fyrir aðild að fullveldi og óskorað forræði yfir auðlindum þjóðarinnar verði grundvallarkrafa í þeim viðræðum, auk skilyrða sem lúta m.a. að hagsmunum landbúnaðar og sjávarútvegs. Fordæmi eru fyrir slíku í samningum annarra þjóða við Evrópusambandið og því algerlega rangt að halda því fram að þessar kröfur hamli því að af aðildarsamningi geti orðið,“ segir í bréfi sem nýkjörin formaður Framsóknarflokksins skrifaði undir á árinu 2009, það er Sigmundur Davíð Gunnlaugsson.

Við vitum hver afstaða flokksins til aðildar að Evrópusamabandinu er nú, fáum árum eftir að Framsóknarfólk sagði: „Við höfum stigið stórt skref, framsóknarmenn, með samþykkt þessarar tillögu,“ það er þegar flokksþing þeirra samþykkti ályktun um að Ísland eigi að hefja aðildarviðræður við Evrópusambandið.

 18.500 lásu Miðjuna síðastliðnar fjórar vikur.