Besta forvörnin gegn þessari fávisku er, að gott og ærlegt fólk í Sjálfstæðisflokknum sem vissulega er stór hópur þar á bæ, taki höndum saman og visti hluta þingflokksins á skaðminni stað en nú er.
Birgir Dýrfjörð.
Birgir Dýrfjörð skrifar:
Í Kastljósi RUV 20. sept. 2023 birtist furðulegt viðtal við Hildi Sverrisdóttur nýbakaðan formann þingflokks Sjálfstæðisflokksins. Umræðuefnið voru tillögur þingflokks sjálfstæðismanna og kvenna um að auka aðgengi almennings að áfengi. Aukning áfengisneyslu er þó 74% sl. 30 ár.
Skorpulifur, banvænn fylgisjúkdómur áfengis hefur áttfaldast. Mest fyrir bjórdrykkju og létt vín.
Formaður þingflokksins sagði bara „Þetta er veruleiki sem við lifum við,“ við fáum því ekki breytt.
Fram kom í viðtalinu að aukið og auðveldað aðgengi að áfengi eykur mjög neyslu þess.
Viðmælendur voru sammála, að með aukinni neyslu áfengis hafa aukist mikið afbrot, ofbeldi, slysfarir og sundrun fjölskyldna og brottfall æskufólks úr skólum. Það eykur síðan á vanhæfi þess unga fólks, að láta rætast drauma sína um gott líf, – það verður þá útundan í lífinu.
Ríkið á ekki að vera að hafa vit fyrir fullorðnu fólki sagði formaðurinn.
Hún upplýsti þó að það væri rifa í frumvarpinu fyrir afskiptasemi Ríkisins. Hún sagði:
„það er kveðið á um það í frumvarpinu okkar að það megi efla forvarnir.“ – Megi.
Sem ábyrgur stjórnmálamaður benti hún líka á fjármögnun á kostnaði við forvarnir.
„Það má selja Áfengisbúðirnar, þá fengist dágóð summa til að kosta forvarnir.“ sagði hún.
(hægt er að sjá og heyra viðtalið á spilara ruv 20.9.´23)
Spurt er.
Til hvers eru forvarnir? Eru þær ekki til að koma í veg fyrir að eitthvað slæmt gerist. T.d. að það verði aukning á neyslu áfengis og fíkniefna í Íslensku samfélagi?
Hvernig getur formaður þingflokks sem flytur frumvarp um risaskref til að auka aðgengi að áfengi, og kallar forvarnir forræðishyggju ríkisins, hvernig getur hann í, sömu ræðunni, haldið því fram, að það megi selja fasteignir ríkisins til að fjármagna forvarnir gegn áfengi?
Hvaða aulaháttur er þetta? Í hvaða kýrhaus er þetta fólk að draga Sjálfstæðisflokkinn?
Besta forvörnin gegn þessari fávisku er, að gott og ærlegt fólk í Sjálfstæðisflokknum sem vissulega er stór hópur þar á bæ, taki höndum saman og visti hluta þingflokksins á skaðminni stað en nú er.
Birgir Dýrfjörð er rafvirki.