Forsætisráðherra þarf að vera harðjaxl

„Almenningur vildi geðþekkan leiðtoga til að halda utan um stjórnartaumana og það er bara ekki að virka. Það þarf að vera harðjaxl í þessu hlutverki, sem er ekki meðvirkur með samstarfsfólkinu heldur er tilbúinn að standa og falla með hugsjónum þeim sem komu viðkomandi í embættið,“ skrifar Birgitta Jónsdóttir, meðal annars í grein sem birtist á Stundinni.

Hún bætir við: „Það er alls ekki við núverandi forsætisráðherra að sakast. Fólk vildi fá svona leiðtoga og er núna agalega reitt yfir því að hafa fengið það sem það bað um. Mér finnst það svolítið ósanngjarnt. Forsætisráðherrann er ekki og hefur aldrei verið einhver harðjaxl sem er tilbúinn að fórna öllu fyrir einhverja hugsjón. VG er ekki lengur hugsjónaflokkurinn um málefnin sem hann var stofnaður utan um.“

Hún skrifar meira um flokk forsætisráðherrans: „Þetta var einu sinni kvenfrelsisflokkur með sterkum feminískum öflum, þetta var einu sinni umhverfisverndarflokkur, þetta var einu sinni flokkur sem laðaði til sín fólk sem var annt um þá sem eiga sér fáa málsvara. Það hefur víst eitthvað farið forgörðum að muna að berjast fyrir því. Enginn af þessum málum eru í takt við hægri flokkinn. Þess vegna mun ekkert af málum þeim sem slá næst hjarta flokksmanna VG verða að veruleika, því það vita allir að stjórnmálakænskan býr í fjármálaráðherranum, enda alinn upp til að vera í þessu hlutverki. Hann er gaurinn sem kemur inn á fundinn með exel-skjalið og á hreinlega fundinn. Fjármálaráðherrann er erkitýpa teflonmannsins. Ekkert neikvætt loðir við hann, hann bara reytir arfa og bakar kökur út á við, á meðan inn á við er hann plottari dauðans og kann að koma sér úr algerlega ómögulegum aðstæðum og standa uppi sem sigurvegarinn. Það er alveg hreint magnað að horfa á þetta. Held að hann hefði átt að vera fótboltamaður, hann er nefnilega jafnvígur í vörn og sókn,“ skrifar Birgitta.