„Ási er vissulega dýr,“ skrifar fyrrum þingmaður Framsóknarflokksins, Karl Garðarsson, og heldur áfram: „…en engan þingmann þekki ég sem sinnir sínu kjördæmi betur. Það er mikilvægt hlutverk hvers þingmanns. Ef menn eru ósáttir með kostnaðinn, þá verður einfaldlega að breyta reglunum, en ekki pönkast á einstaka þingmönnum,“ skrifar Karl.
Hinkrum aðeins við. Nú þarf að meta hvaða kjósendur hafa fengið fyrir alla peningana sem Ásmundur Friðriksson hefur fengið. Þar sem hann keyrir meira en aðrir þingmenn, og þarf nú talsvert til, er hann þá bestur þingmanna? Karl Garðarsson lætur að því liggja.
Sést það í þingstörfum Ásmundar? Er Ása greiði gerður þegar Karl Garðarsson dregur þetta upp á dekk? Það held ég ekki. Sjálfur hef ég fylgst vel með þingstörfum í áratugi og get ómögulega séð að Ásmundur Friðriksson skáki öðrum þingmönnum við sökum þekkingar, yfirsýnar eða hvað hann á öðlast í öllum þessum bílferðum.
Hvernig væru þingstörfin ef allir þingmenn hefðu sama háttinn á og Ásmundur gerir?
Þá er næst að leita til Alþingis. Hvernig hefur Ási mætt til nefndarstarfa, hvernig hefur hann mætt til þingstarfa, hversu oft tekur hann til máls og hversu lengi talar hann að jafnað, þingið er jú málstofa, hversu margar fyrirspurnir hefur hann lagt fram sem og frumvörp og þingsályktanir.
Verði svörin í takt við það sem Karl Garðarsson vill vera láta er best að reka alla þingmenn í bílferðir. Alþingi má vissulega gera betur. Það er ótrúlegt að lausnin sé fólgin háttalagi Ásmundar Friðrikssonar. Hvernig væru þingstörfin ef allir þingmenn hefðu sama háttinn á og Ásmundur gerir?
