Víst er að ekkert aðhald verður í Vinstri grænum og Framsókn.
Ekki eru svo mörg ár síðan Engeyingar réðu Íslandsbanka. Það voru góðir dagar fyrir þá. Frjálst aðgengi að öflugum banka. Stefnan virðist vera sú að endurheimta bankann. Lifa aftur við sérkjörin sem áður voru.
Pólitíski armur Engeyinga, Bjarni Benediktsson fjármálaráðherra, keppist sem mest hann getur til að skila bankanum „heim“. Koma lyklunum á réttan stað. Að ríkið skili lyklunum. Alls er óvíst að Sjálfstæðisflokkurinn verði áfram í þeirri stöðu sem hann nú hefur, eftir kosningarnar í september.
Því ber að hafa hraðar hendur. Láta verkin tala. Takist Bjarna að koma yfirráðum bankans úr höndum ríkisins og til réttra manna er mögulegt að hann fái að hætta í stjórnmálunum. Sem hann virðist vera orðinn leiður á. Er oft sýnilega bæði pirraður og önugur.
Bjarna hefur tekist að verja stjórnarskrána, kvótakerfið og krónuna. Þar getur hann ekki gert betur. Honum hefur tekist að færa ómælda peninga úr ríkissjóði til stærstu fyrirtækja landsins. Nú á hann það eitt eftir að koma Íslandsbanka „heim“.
Víst er að ekkert aðhald verður í Vinstri grænum og Framsókn. Áætlun Bjarna og annarra Engeyinga virðist ætla að takast. Þeir munu endurheimta Íslandsbanka. Til þess hefur Bjarni kostað til þreki, tárum og blóði.
-sme
