Stjórnmál Sóley Tómasdóttir, sem verður forseti borgarstjórnar, var mjög gagnrýnin á margt í störfum fráfarandi meirihluta, meirihluta Besta flokksins og Samfylkingarinnar. Tveimur dögum fyrir kosningar skrifaði Sóley þetta heimasíðu sína:
„Meirihluti Besta flokks og Samfylkingar hefur sýnt fádæma skilningsleysi á skólastarfi allt kjörtímabilið, sameinað skóla þvert gegn ráðleggingum og vilja fagfólks, afnumið neysluhlé í leikskólum og hagrætt umfram það sem eðlilegt getur talist. Ummæli oddvitans eru í fullu samræmi við þessa framgöngu. Hann virðist enn ekki skilja að leggja þurfi aukna áherslu á skólastarf, forgangraða fjármunum í þágu skólastarfs og standa með starfsfólki í skólastarfi.
Stefna Vinstri grænna er skýr. Leikskólar, skólamáltíðir og frístundaheimili eiga að vera fyrir öll börn. Það þarf að bæta kjör og starfsaðstæður kennara og uppeldisstarfsfólk og efla innra starf. Skólamáltíðirnar eiga að vera hollar og góðar. Það þarf ekki að velja á milli þessara verkefna. Afarkostapólitík á ekki við. Forgangsröðum þannig að þau verði öll að veruleika.“
Sagði svo: „Vinstri græn eru í stjórnmálum til að breyta. Til að tryggja réttlátara samfélag. Kjósendur hafa val um kjarkmikið og framsýnt framboð eða varðstöðu um óbreytt ástand. Ég mæli með því fyrrnefnda.“
