Elliði Vignisson, bæjarstjóri í Vestmannaeyjum, segist ánægður með sinn mann, Pál Magnússon, eftir að Páll sagði í gærkvöld, að hann vilji að Alþingi grípi inn í sjómannadeiluna, leysi ríkisstjórnin ekki þann vanda, sem að hann snýr.
„Ráðherrar eiga ekki að fara með svona mál sem sín persónuleg mál. Þetta eru hagsmunir þjóðarinnar. Vel gert,“ skrifar Elliði Vignisson á Facebook.
Hann skrifar einnig: „Auðvitað greiða útgerðirnar dagpeningana um það er ekki deilt. Eingöngu er deilt um hvort sjómenn eiga að hafa sama rétt til að fá slíkar greiðslur frá sinum vinnuveitendum eins og td. flugáhafnir.“
Benedikt Jóhannesson, formaður Viðreisnar og fjármálaráðherra, var í viðtali í morgunútvarpi rásar eitt í morgun. Hann sagði þar að ekki væri brestir í stjórnarsamstarfinu vegna sjómannadeilunnar. Hann sagðist hafa rætt í gær við formenn hinna stjórnarflokkanna, Bjarna Beneddiktsson og Óttarr Proppé, um málið og ekki væri að skilja að sjómannadeilan hefði raskað samstarfi flokkanna.
Á það á eflaust eftir að reyna fylgi Páll Magnússon orðum sínum eftir. Að því gefnu að málið leysist ekki fyrr.
