Kolbrún Baldursdóttir, borgarfulltrúi Flokks fólksins:
Ekkert heyrist frá Félagsbústöðum um hvort fyrirtækið hyggst fylgja fordæmi annarra leigufélaga og fella niður leigu í 2-3 mánuði og frysta skuldir sem eru komnar í innheimtu hjá lögfræðingum. Þetta er mikilvægt að gera til að létta undir með fólki og hefur Flokkur fólksins lagt fram tillögu um þetta í borgarráði en þeirri tillögu var frestað.
Í fyrra tók fyrirtækið upp á því að senda allar skuldir í innheimtu hjá lögfræðingum. Flokkur fólksins lagði til að Félagsbústaðir féllu frá þessu og gefi fólki aftur tækifæri til að semja um skuld á skrifstofunni eins og áður var hægt. Við því var ekki orðið og ekki hefur borgarmeirihlutinn viljað beita sér með neinum hætti.
Sú ákvörðun að beina öllum ógreiddum leigugjöldum til innheimtufyrirtækis kemur mörgu illa. Vitað er að þegar skuld er komin í innheimtu hjá lögfræðingum þá leggjast innheimtugjöld ofan á hana.
Nú ríkir erfitt ástand hjá mörgum vegna C-19 og sýnt þykir að einhverjir missa vinnu sína eða mæta öðrum erfiðleikum sem veiruváin veldur fólki og samfélaginu. Margir leigjendur eru öryrkjar. Síðustu vikur hafa reynt á og næstu vikur munu einnig taka á. Mikilvægt er að fyrirtæki eins og Félagsbústaðir sýni sveigjanleika, lipurð og mannlegheit og umfram allt taki mið af þessum erfiðu aðstæðum sem nú ríkja