Ekki bara auðlindagjald á sjávarútveg

Gunnar Bragi Sveinsson, ásamt öllum öðrum þingmönnum Framsóknarflokksins, hefur lagt fram þingsályktunartillögu vegna auðlindagjalda.

Þar er gert ráð fyrir að forsætisráðherra skipi starfshóp sem skili tillögum um hvort innheimta eigi afnotagjald fyrir nýtingu auðlinda og þá hvaða auðlinda, leggi fram tillögu um aðferð við álagningu auðlindagjalds sem gæti gengið fyrir allar auðlindir og geri grein fyrir kostum og göllum mismunandi aðferða og taki saman upplýsingar um hvernig gjaldtöku af auðlindanýtingu er háttað í nágrannaríkjum.

Þingmennirnir telja ekki eðlilegt að auðlindagjald sé aðeins lagt á eina atvinnugrein, það er sjávarútveg. Þeir segja mikilvægt að mótuð verði heildstæðari stefna. „Enda hefur nýting auðlinda áhrif á umhverfið og brýnt er að tryggt verði að auðlindir séu nýttar á skynsamlegan og arðbæran hátt. Flutningsmenn vilja jafnframt minna á að fram hafa komið hugmyndir um stofnun stöðugleikasjóðs að fyrirmynd norska olíusjóðsins þar sem arður af auðlindum í ríkiseigu mundi renna allur eða að hluta í slíkan sjóð.“

Þeir vilja að forsætisráðherra skipi starshópinn. „Enda liggur ekki fyrir nú þegar um hvaða auðlindir er að ræða og geta þær fallið undir fleiri en eitt ráðuneyti og stofnanir. Jafnframt er málefnið umfangsmikið og brýnt auk þess sem það hefur verið til umræðu um árabil og er því eðlilegt að forsætisráðherra stýri vinnunni.“

Gunnar Bragi Sveinsson verður meðal gesta í Svartfugli sem verður á dagskrá Hringbrautar annað kvöld og sendur út samtímis hér á vefnum.

Hér er þingsályktunartillgan.

-sme