Þorsteinn Sæmundsson Miðflokki segir tillögu síns flokks varðandi fjölmiðla algjörlega frábæra. Þeir vilja að fólk fái að velja hvert afnotagjaldið rennur, það sem nú fer sjálfkrafa til Ríkisútvarpsins.
„Það er kannski þess vegna sem við Miðflokksmenn höfum lagt fram tillögu, sem Kolbeinn Óttarsson Proppé segir að sé ættuð úr smiðju Davíðs Oddssonar, hún versnar ekki mikið við það. Ég er honum þakklátur fyrir að benda á þetta og ég held að allir viti það sem hér eru að háttvirtur þingmaður er sagnfræðimenntaður og ég trúi honum mjög vel í þessu efni. En það breytir ekki því að hugmyndin er góð. Ég held að hugmyndin sé réttara sagt algjörlega frábær. Ef við gefum fólki kost á því, nákvæmlega eins og við gerum með sóknargjöldin að hluta, við getum jú ánafnað þeim til annarra trúfélaga, þá finnst mér bara hin besta hugmynd að við veitum fólki, þ.e. þjóðinni, almenningi, möguleika á því að beina afnotagjaldi sínu til þeirra fjölmiðla sem hugur þeirra stendur til upp að vissu marki svo að ekki sé sparkað löppunum undan Ríkisútvarpinu í einu vetfangi. Enda segir það líka í mörgum könnunum og Ríkisútvarpið hefur verið mjög duglegt að halda því á lofti að traust til þess sé alveg ótrúlega mikið. Einmitt með þessari hugmynd fáum við sönnun þess og það góða fólk sem starfar við RÚV fær þá líka beint í æð hversu mikils trausts stofnunin eða fyrirtækið og þetta ágæta starfsfólk nýtur og ég held að það sé líka mjög gott,“ sagði Þorsteinn. Og hann sagði einnig:
„Það sem er kannski líka svo vont, herra forseti, er að við lestur á ársreikningi RÚV er ekki nokkur vegur að sjá hvað Rás 1 kostar, hvað Rás 2 kostar, hvað sjónvarpið kostar. Það er ekki hægt. Ef við hugsuðum upphátt og værum kannski að trimma Ríkisútvarpið niður, t.d. með því að leyfa fólki að ráða sjálfu hvert hluti af afnotagjaldinu rynni, væri afar erfitt fyrir okkur að reyna að hafa einhver áhrif til góðs á þennan rekstur ef við vitum ekki hvernig hann er samsettur.“
