„Ég hef verið á þingi frá 2009“
Lilja Rafney Magnúsdóttir, formaður atvinnuveganefndar, ósátt með málfutning Álfheiðar Eymarsdóttur, sem mótmælir frumvarpi Liju Rafneyjar um breytingar á strandveiðum.
„Ég mótmæli því efni þessa frumvarps. Við verðum að breyta því,“ sagði varaþingmaður Pírata, Álfheiður Eymarsdóttir, þegar hún talaði um frumvarp um breytingar á strandveiðunum.
„Leyfum hverjum báti að eiga 12 örugga veiðidaga í hverjum mánuði. Gerum þá tilraun í sumar og metum svo árangurinn í haust. Veiðigeta strandveiðiflotans er ekki slík að þorskstofninn við Íslandsstrendur hrynji við þá tilraun. Enda er strandveiðum ofstjórnað hvort eð er. Það er heildaraflastýring. Nú er komin sóknarstýring ofan á hana. Það eru reglur um hvaða daga megi róa, reglur um hversu langur róðurinn má vera, reglur um hámarksafla í hverjum róðri. Það vantar bara reglur um hvernig báturinn má vera á litinn.“
Lilja Rafney Magnúsdóttir, formaður atvinnuveganefndar, svaraði Álfheiði og virtist ekki beint sátt við framgöngu hennar.
„Ég hef verið á þingi frá 2009 og hef verið með strandveiðum frá upphafi,“ sagði hún minnti á reynslu sína af þingstörfum sem er mun meiri en Álfheiðar.
„Vinstri græn komu strandveiðum á, fyrst Steingrímur J. Sigfússon sem sjávarútvegsráðherra og síðar Jón Bjarnason,“ bætti Lilja við og hélt áfram.
„Þetta mál hlaut þegar á leið mikinn velvilja í landinu. Ekki voru allir jafn hrifnir af þessu fyrst en ég hef átt marga góða bandamenn á þingi sem vilja styrkja og efla strandveiðar. Þess vegna var mikið átak að ná öllu saman innan atvinnuveganefndar.“
