„Einstaklingur sem fer að vinna, hvort sem hann er ellilífeyrisþegi eða öryrki, borgar skatt og bætir líf sitt og aðstöðu. Og að við skulum geta sagt: Nei, þú mátt bara vinna fyrir 200.000 kr. vegna þess að þú ert ellilífeyrisþegi. Hver eru síðan rökin fyrir því að þú megir bara vinna fyrir 109.500 kr. af því að þú ert öryrki og hafir bara 25.000 kr. frítekjumark á lífeyrissjóðsgreiðslur? Þú mátt hafa 90.000 kr. frítekjumark á fjármagnstekjur ef þú ert öryrki en 300.000 kr. sem ellilífeyrisþegi,“ sagði Guðmundur Ingi Kristinsson, Flokki fólksins.
„Ég hef engin rök séð fyrir svona vitleysu en samt er þetta staðreynd. Í allri þessari óðaverðbólgu sem við höfum núna þá held ég að við hljótum að vera eina þjóðin í heiminum, nema kannski í Tyrkland eða annars staðar, sem gæti dottið eitthvað svoleiðis í hug. Við erum með fjármagnstekjur sem við sköttum og sumir eru í mínus. Við látum það ekki duga heldur skerðum þær líka allt upp undir 80–90%. Svo erum við með vexti sem ná ekki einu sinni að dekka verðbólguna og eru þar af leiðandi tap. Þetta er svo heimskulegt að maður spyr sig oft hver hafi fundið þetta upp og hvers vegna í ósköpunum er þessu viðhaldið? Ég hélt það væru mistök en er sannfærður um að þetta er útspekúlerað kerfi til að klekkja á ákveðnum hópi fólks.“
