Efling hefur vísað kjaradeilu félagsmanna sinna sem starfa hjá fyrirtækjum innan Samtaka sjálfstæðra skóla (SSSK) gagnvart Samtökum atvinnulífsins til ríkissáttasemjara. Stéttarfélagið sér ekki aðra leið færa til að koma gangi á viðræðurnar eftir að hafa ítrekað óskað eftir því við SA að haldinn verði samningafundur í deilunni.
„Með þessu skrefi vonumst við til að geta hafið eiginlegar samningaviðræður við SA og þar með fært félagsmönnum okkar innan SSSK sambærilegar kjarabætur og félagsmönnum Eflingar hjá Reykjavíkurborg og öðrum sveitarfélögum í nágrenninu. Þessi hópur vinnur sambærileg störf á sama vinnusvæði og því er ekki annað réttlætanlegt en að hann beri það sama úr býtum og þessir hópar,“ segir Sólveig Anna Jónsdóttir formaður Eflingar. „Löngu eru orðið tímabært að þessar viðræður séu hafnar af alvöru.“
Samningar hátt í 300 félagsmanna Eflingar starfandi í skólum og leikskólum innan SSSK gagnvart SA hafa verið lausir frá því í mars í fyrra. Efling leit svo á að hægt væri að hefja formlegt samningaferli í kjölfar staðfestingar SA þess efnis í lok febrúar. Sú varð ekki raunin því að SA hefur ekki svarað ítrekuðum óskum stéttarfélagsins um viðræður frá því í apríl.