Baráttukonan, einkaþjálfarinn og hlaðvarpsstjórnandinn Edda Falak gerir lítið úr Miðflokknum. Í hennar augum virðist flokkurinn gera lítið fyrir hana, að minnsta kosti ef marka má færslu hennar á Twitter þar sem hún segir einfaldlega:
„Miðflokkurinn er svo mikið djók“
Fleiri voru orð hennar ekki og því er það ekki alveg ljóst hvað það er sem Eddu mislíkar svona við Miðflokkinn. En líklegast má telja að flokkurinn fá allavega ekki hennar atkvæði um helgina.
Hvort að Miðflokkurinn fái atkvæði Láru Ómarsdóttur upplýsingafulltrúa er aftur á móti óvíst. Samkvæmt hennar nýjustu færslu á Facebook virðist hún ekki hafa minnstu hugmynd um hvað hún eigi að merkja við í kjörklefanum.
„Aðeins um kosningapróf fjölmiðla – niðurstaðan hjá mér eftir að hafa tekið þessi próf er alveg út úr kortinu klikkuð og engan veginn í takt við mínar áherslur. Ég held að það sé vegna þess hve mikil áhersla sé sett á að spyrja út í steinsteypu (flugvöll, gatnagerð, húsbyggingar) en minna á það sem skiptir mig máli sem eru skólamál, leikskólamál, félagslega kerfið, umhverfismál, málefni aldraðra og öryrkja og þjónustu við borgarbúa almennt, já og alvöru lausnir á húsnæðismarkaði.
Mér er alveg sama hvort Sundabraut verður í göngum eða brú. Ég vil bara að hún verði að veruleika.
Mér er líka alveg sama hvar öryggisflugvöllur Keflavíkurflugvallar er, ég vil bara að hann sé til og þjóni sínu hlutverki með sóma.
Ég hef heldur enga skoðun á Borgarlínu. Ég vil bara almenningssamgöngur sem virka og að gjaldið sé lægra en það er núna.
Mér er líka alveg sama hvort byggð verði þétt austan eða vestan Elliðarár. Ég vil bara að það verði byggðar íbúðir sem fólk hefur efni á að kaupa.
Mér er hins vegar ekki sama um fólkið í borginni og þá þjónustu sem borgin á að mínu mati að veita þeim.
Um þessi málefni heyrist hins vegar minna og fáar spurningar eru á kosningaprófum um þau, finnst mér. Ég hef því enga hugmynd um hvað ég ætla að kjósa á laugardag sem þýðir að ég þarf þá að fara að skoða stefnuskrár flokkanna. Einhverja hluta vegna finnst mér nefnilega flokkunum hafa mistekist að koma sjónarmiðum sínum á framfæri í þessum málaflokkum. Í það minnsta við mig.“