Drykkja jókst með bjórnum

Íslendingar drekka mun meira af áfengi nú en áður. Frá árinu 1980 og til ársins í fyrra hefur drykkjan aukist um 73 prósent. Það er Hagstofan sem birtir þessar upplýsingar.

„Áfengisneysla, byggð á áfengissölu hérlendis, var um 2.015 þúsund alkóhóllítrar árið 2016 samanborið við rúmlega 1.324 þúsund lítra árið 2000 og 716 þúsund lítra árið 1980. Mælt í hreinum vínanda á íbúa 15 ára og eldri var neyslan 7,50 lítrar árið 2016, 6,14 árið 2000 og 4,33 lítrar árið 1980. Áfengisneysla hefur því aukist um 73% milli áranna 1980 og 2016 sé horft til alkóhóllítra á íbúa 15 ára og eldri.“

Bjórinn breytti miklu

Hagstofan segir að áfengisneysla hafi  vaxið hægt á árunum 1980–1988 en jókst umtalsvert árið 1989 þegar sala bjórs var heimiluð hér á landi. „Dró síðan úr henni en frá árinu 1994 fór hún stigvaxandi fram til ársins 2007 þegar hún varð hvað mest. Í kjölfarið minnkaði áfengisneysla aftur í nokkur ár en jókst á ný og var mest árið 2015, 7,66 alkóhóllítrar á íbúa 15 ára og eldri. Ætla má að fjölgun ferðamanna til landsins á síðustu árum eigi sinn þátt í þeirri aukningu sem orðið hefur á sölu áfengis undanfarið.“

Mælt í hreinum vínanda á íbúa 15 ára og eldri var neysla bjórs 4,24 lítrar árið 2016, neysla léttra vína 2,09 lítrar og neysla sterkra drykkja 1,16 lítrar.

Bjórinn er meira en helmingur

„Mikil breyting varð á áfengisneyslu í kjölfar þess að sala á bjór hófst. Árið 1988 var hlutur sterkra drykkja 77% og léttra vína 23% mælt í hreinum vínanda,“ segir Hagstofan.

„Árið 1989 fór hlutur sterkra drykkja niður í 52% og hlutur léttra vína í 14% en sala bjórs varð 34% af heildarsölu áfengis í alkóhóllítrum talið þó einungis hafi verið um 10 mánaða sölu að ræða. Hlutur bjórs minnkaði lítillega næstu árin en jókst síðan jafnt og þétt og hefur verið um og yfir helmingur heildarsölu áfengis í alkóhóllítrum um langt skeið. Árið 2000 var bjór 49% seldra alkóhóllítra, létt vín 22% og sterk vín 29%. Síðustu árin hefur hlutur bjórs aukist enn frekar og var 57% áætlaðrar heildarsölu árið 2016. Á sama tíma hefur dregið verulega úr sölu sterkra drykkja og er hlutur þeirra nú tæplega 16%. Neysla léttra vína minnkaði einnig við tilkomu bjórsins en jókst síðan aftur og hafa létt vín verið 26–29% af áætlaðri heildarneyslu mælt í hreinum vínanda síðustu árin (28% árið 2016).“

Við og hin löndin

Dregið hefur úr áfengisneyslu í Danmörku, Færeyjum og á Grænlandi og einnig lítillega í Finnlandi frá árinu 2000 á sama tíma og hún hefur aukist á Álandseyjum, í Noregi, Svíþjóð og á Íslandi. Mestur er samdrátturinn á Grænlandi en aukningin mest á Íslandi á þessu tímabili.