„Fyrir réttarkerfið hefur það allt að segja að það bæði starfi sjálfstætt og ásýndin sé að svo sé. Undir þennan hatt falla dómstólarnir, ákæruvaldið og lögreglan. Sjálfstæði þessara stofnana er í raun súrefni þeirra. Þess vegna verður það alltaf að vera algerlega skýrt að þær fái að starfa þannig að raunverulegt sjálfstæði þeirra geti aldrei verið dregið í efa,“ sagði Þorbjörg Sigríður Gunnlaugsdóttir Viðreisn, á þingi í dag. Tilefnið þekkja allir.
„Ég ætla ekki að standa hér og fullyrða neitt um það af hvaða ástæðu dómsmálaráðherra kaus sjálf að hringja í lögreglustjóra tvisvar á aðfangadag, enda veit ég það ekki umfram þær skýringar sem ráðherra hefur sjálf gefið á því. En skýringar hennar sjálfrar benda hins vegar til þess að erindið hefði í það minnsta mjög auðveldlega getað sett lögreglustjóra í óþægilega stöðu, símtal hennar sjálfrar til lögreglustjóra. Hvarflaði það virkilega ekki að ráðherra að samskiptin og bein símtöl hennar sjálfrar til lögreglustjóra væru óeðlileg á þessum tímapunkti, til lögreglustjóra sem þarna var í blábyrjun rannsóknar á meintum brotum á sóttvarnalögum af hálfu samflokksmanns þessa ráðherra og formanns?
Krafan er ekki bara sú að stjórnvöld tjái sig ekki um einstök mál heldur gæti þess í hvívetna að snerta ekki á þeim heldur og að þau gefi aldrei annað til kynna. Mér finnst símtal ráðherra til lögreglustjóra á þessum tímapunkti því miður til þess fallið að vekja upp spurningar á skilningi á þessum mörkum. Ég ber fullt og óskorað traust til lögreglunnar í þessu máli sem öðrum en hegðun og gerðir ráðherra þennan dag finnst mér hins vegar mikill dómgreindarbrestur og kalla á það að ráðherra svari því af hvaða ástæðu hún hafði samband við lögreglustjóra þennan dag og eftir hverju hún var að leita.“