Að sjálfsögðu bera þeir enga ábyrgð á hvernig mál þróuðust.
„Það voru auðvitað vísindamenn, þar með taldir allir hinir færustu á því sviði, sem færðu heiminum kjarnorkuvopn. En að sjálfsögðu bera þeir enga ábyrgð á því hvernig þau mál þróuðust. Ábyrgðin var og er og hlaut að vera annarra. Þeirra sem höfðu lýðræðislegt umboð. Og þeirra sem höfðu hrifsað sér vald.“
Þannig skrifar ritstjóri Moggans, Davíð Oddsson, þegar hann gagnrýnir hversu langt hefur verið gengið í vörnum gegn Covid 19.
„Margt bendir til að forysta WHO, öryggisstofnunar Sameinuðu þjóðanna, í þessum efnum hafi sýnt ótilhlýðilega og ófyrirgefanlega þjónkun á þessum örlagaríku vikum,“ skrifar Davíð í Reykjavíkurbréfi morgundagsins.
Eins og í trúboðinu um hlýnun jarðar.
Hann heldur áfram: „Það er erfitt að hugsa sér stórkarlalegri ákvörðun en þá að skella heiminum nánast fyrirvaralaust í lás og hafa þá enga eða litla hugmynd um afleiðingar þess. Afsökun þessa slaka grundvallar fyrir svo stórri ákvörðun var sú óljósa áhætta, en þó örugglega mikil, sem sneri í upphafi að heilsu og lífi jarðarbúa.“
Davíð leggur krók á leið sína og kemur að efasemdum um ástæður fyrir hlýnun jarðar, og nefnir Gretu Turnberg:
„Það þykir fínt að segja að vísindamenn verði auðvitað og óhjákvæmilega að vera í fararbroddi slíkra viðbragða. Í ljósi þess hvernig frasar af slíku tagi hafa heltekið umræðu síðustu ára, eins og í trúboðinu um hlýnun jarðar, er auðvitað erfitt að halda höfði. Í því síðastnefnda hefur því verið komið svo fyrir að þeir sem efast um algildan sannleik kenninganna missa tilkall til að kallast vísindamenn og fá ekki lengur að viðra sjónarmið sín og eru ekki taldir með við fullyrðingar um að einungis eitt hljóð komi úr öllum börkum visindanna! Tólf ára stúlka var þó talin hafa meira vísindalegt vægi en sá mikli fjöldi vísindamanna sem leyfði sér að efast og færði fyrir því rök!“
