ALÞINGI „Fyrst er náttúrlega að minna á að það er athyglisvert að sjá hversu hraustleg verðtryggingarstjórn þessi ríkisstjórn er, því að tryggilegri verðtryggingarákvæði hafa ekki sést í nokkrum samningi sem ríkið gerir en í þeim sem hér liggur fyrir. Það hefur verið tekin ákvörðun, með þessum samningi, um gríðarleg útgjöld, nærri 200 milljarða kr., eða sem samsvarar fyrsta Icesave-samningnum sem ráðherra þessarar ríkisstjórnar gagnrýndu nú margir hverjir — þeir gagnrýndu skort á samráði í aðdraganda hans og vönduðum vinnubrögðum við samningsgerðina,“ sagði Árni Páll Árnason á Alþingi í dag.
Hann talaði einnig um skort á samráði við samningsgerðina. „ Hér er búið að gera samning án nokkurs samráðs við ráðherraskipaða nefnd sem var ekki einu sinni kölluð saman og átti að fjalla um búvörumálin…“
Án samráðs við þingið
Árni Páll átti í orðastað við Bjarna Benediktsson, Árni Páll sagði:
„Ég vil þess vegna spyrja hæstv. ráðherra hvernig hann telji mögulegt að réttlæta þennan samning, aðdraganda hans og vinnubrögðin. Hvernig stendur á því að honum finnst eðlilegt að ganga frá samningi af þessum toga, um útgjöld sem eru svona umtalsverð, án þess að eiga um það samráð við þingið, án þess að kalla fulltrúa launþega og fulltrúa starfsmanna í greininni að borðinu; gera hann einvörðungu milli ríkisstjórnarflokkanna og trúnaðarmanna ríkisstjórnarflokkanna innan Bændasamtakanna?“
Kýrnar sofa út á sunnudögum
„Varðandi hagræðinguna, sem nefnd er hér, að það sé ekkert fast í hendi, finnst mér þetta orðin dálítið skondin umræða. Það eru ekki mörg ár síðan þáverandi landbúnaðarráðherra, Guðni Ágústsson, stóð hér og þurfti að svara fyrir það að það væri svo mikil fækkun bænda í Flóanum sem leiddi af því að eignamenn úr Reykjavík væru að kaupa upp jarðirnar og kvótinn allur framseldur. Ég man eftir því að hafa setið hér í þingsal þegar hann sagði að íslenska kýrin keppti ekki við það að sofa út á sunnudögum,“ sagði Bjarni meðal annars í svari sínu.
