Kolbeinn Óttarsson Proppé er gott dæmi um þingmann sem á að fá sér aðra vinnu.
Katrín Baldursdóttir skrifar:
Hættum að vera meðvirk með þingmönnum sem hafa ekkert fram að færa! Hafa ekkert erindi sem skiptir máli. Kolbeinn Óttarsson Proppé þingmaður Vg er einn þeirra. Fyrir kosningar gaf sig út fyrir að vera boðberi frelsis og bættra kjara fyrir þá verst settu. En nú er hann bara boðberi nútíma kapítalisma og markaðshyggju, málpípa fyrir hægri öflin. Hlustið bara á hann hérna í Sprengisandi í morgun. Nei, Kolbeinn Óttarsson Proppé er gott dæmi um þingmann sem á að fá sér aðra vinnu. Hann siglir undir fölsku flaggi og við eigum ekki að borga honum kaup fyrir það.
Hættum meðvirkni.
Og þeir eru fleiri sem ættu að yfirgefa þingsali og fá sér vinnu annars staðar. Venjulegt fólk á Íslandi hefur ekkert gagn af þeim. Þeir hlusta ekki á vilja almennings. Hafa einangrað sig frá grasrótinni, venjulegu fólki á Íslandi sem vill raunverulegar breytingar á skipan mála í þjóðfélaginu, vill ekki fátækt, vill gott húsnæðiskerfi, vill ekki að börn þurfi að lifa við fátækt og slæmar aðstæður, vill gott heilbrigðiskerfi og gott menntakerfi byggt á jafnræði, vill að allir hafi mannsæmandi laun, vill nýja stjórnarskrá, vill að arðurinn af sameiginlegum auðlindum renni til allra í þjóðfélaginu svo dæmi séu tekin.
Hættum meðvirkni og hendum þessum gagnslausu þingmönnum út af Alþingi. Það er aðeins rúmt ár í næstu kosningar. Það er að segja ef ríkisstjórnin fellur ekki fyrir þann tíma.