„Mikið er gleðilegt að frjálslynda fólkið í ríkisstjórninni ætli að banna peningaseðla í baráttunni gegn skattsvikum. Að vísu mun móðir mín á tíræðisaldri svelta en það er smámál miðað við að gera skattsvikurum erfiðar fyrir. Næst er bara að koma myndavélum á vegum ríkisins inn á hvert heimili til að koma í veg fyrir heimilisofbeldi,“ skrifar Brynjar Níelsson, þingmaður Sjálfstæðisflokksins, á Facebook og hæðist þar að samstarfsfólki sínu í Viðreisn, ekki síst formanni flokksins, Benedikt Jóhannessyni fjármálaráðherra.
Guðfinna J. Guðmundsdóttir, borgarfulltrúi Framsóknarflokksins, man greinilega að Brynjar sagðist hafa samþykkt jafnlaunavottunarmál Viðreisnar með æluna í kokinu. Hún spyr: „Heldurðu að þú samþykkir það nú ekki eins og jafnlaunavottunina.“
Brynjar svara að bragði: „Nei, þar var ríkisstjórnin öll undir.“
Ljóst er af fréttum dagsins að vandi ríkisstjórnarinnar vex.
Óskar Magnússon, lögfræðingur og rithöfundur, hefur einnig gaman að Benedikt og Viðreisn: „Það er best að sleppa peningaseðlum og kortum og taka upp vöruskipti á ný. Leðurstóll og reiðstígvél fyrir rakstrarvél. Kíló af nautahakki fyrir hjónavígslu og mótatimbur gegn naglasnyrtingu fyrir tvo (fætur). Hvað gerir ríkið þá?“
-sme
