Brynjar fékk yfirhalningu frá húsmóður: „Er ekki bara best að þú gangir í Framsókn?“

Brynjar Níelsson er með skemmtilegri mönnum og á það til að láta allt flakka – eins og hér:

„Ég fæ oft leiðbeiningar og vinsamlegar ábendingar heima hjá mér, eins og húsmóðirin kallar það. Yfirhalning er orð sem mér finnst eiga betur við þótt röddin sé oftast lágstemmd og mildileg,“ segir Brynjar og bætir við:

„Ég fæ reglulega ábendingu um að þó ég sé hið besta skinn inn við beinið sé lítið að marka mig. Ég segði eitt en gerði svo annað.

Ég stæði sjaldan við loforð, sem ég gæfi þó í fullri einlægni. Þótt ég gæfi mig út fyrir að vera samvinnufús væri ég það bara þegar hentaði mér.

Þá væri ég full íhaldsamur og bent á að það má skipta um eldhússinnréttingu áður en hún hrynur af sjálfsdáðum. Það væri jafnvel sniðugt að kaupa ekki alltaf sömu áfengistegundina í ÁTVR.“

Að lokum nefnir Brynjar að kona hans hafi sagt við hann:

„Er ekki bara best að þú gangir í Framsókn sagði húsmóðirin nú um helgina að niðurlotum komin og var þá röddin hvorki lágstemmd né mild.“