Neytendur Bónus var með lægsta verðið á matarkörfunni þegar verðlagseftirlit ASÍ kannaði verð í lágvöruverðsverslunum og stórmörkuðum á höfuðborgarsvæðinu síðastliðinn mánudag. Matarkarfan var ódýrust hjá Bónus á 17.586 kr. en dýrust hjá Hagkaupum 20.960 kr. sem er 3.374 kr. verðmunur eða 19%.
Krónan var með næst ódýrustu matarkörfuna en þar kostaði hún 17.870 kr. sem er 2% meira en hjá Bónus. Í Nettó kostaði hún 18.730 kr. sem er 7% dýrara en hjá Bónus og í Fjarðarkaupum kostaði hún 19.510 kr. sem er 11% dýrara en hjá Bónus.
Eins og komið hefur fram var matarkarfan dýrust hjá Hagkaupum 20.960 kr. en var hún aðeins 115 kr. ódýrari hjá Iceland, en báðar verslanirnar voru 19% dýrari en karfan hjá Bónus. Verslunin Samkaup-Úrval var 18% dýrari en ódýrasta karfan og hjá Víði var karfan 16% dýrari en sú ódýrasta.
Af einstaka vörum í matarkörfunni var mestur verðmunur á ódýrustu fáanlegu bönunum sem voru dýrastir á 414 kr./kg. í Hagkaupum en ódýrastir á 189 kr./kg. hjá Bónus, verðmunurinn var 225 kr. eða 119%. Mikill verðmunur var einnig á lárviðarlaufum í poka frá G. Pálsson sem voru dýrust á 133 kr. hjá Víði en ódýrust á 98 kr. hjá Bónus, verðmunurinn var 35 kr. eða 36%.
Í mælingum verðlagseftirlits er oftast minnstur verðmunur á mjólkurvörum, þessi mæling er engin undartekning. Minnstur verðmunur að þessu sinni var á ½ l. af Stoðmjólk frá MS sem kostaði 112 kr. hjá Bónus, Krónunni og Víði en 115 kr. hjá Samkaupum-Úrvali og Hagkaupum sem er 3 kr. verðmunur eða 3%. Af öðrum vörum má nefna að frosin lambahryggur var dýrastur á 2.489 kr./kg. hjá Hagkaupum en ódýrastur á 1.959 kr./kg. hjá Bónus, verðmunurinn var 530 kr. á kg. eða 27%. Lakkrísperlur frá Nóa voru dýrastar á 307 kr./stk. hjá Samkaupum-Úrvali en ódýrastar á 227 kr./stk. hjá Bónus sem er 35% verðmunur.
Matarkarfan samanstendur af 48 almennum neysluvörum til heimilisins t.d. mjólkurvörum, morgunkorni, grænmeti, kjöti, drykkjarvörum, ásamt ýmsum pakkavörum, dósamat og fleiru.
Í könnuninni var skráð niður hilluverð vöru eða það verð sem neytandinn hefur upplýsingar um inni í búðinni að hann eigi að greiða fyrir vöruna. Þegar skýrt er gefið til kynna að veittur sé afsláttur af merktu verði við kassa var skráð afsláttarverð. Til að auðvelda verðsamanburð er skráð mælieiningaverð vöru, þar sem pakkastærðir eru mismunandi eftir verslunum.
Könnunin var gerð á sama tíma í eftirtöldum verslunum; Bónus Smiðjuvegi, Krónunni Lindum, Nettó Mjódd, Fjarðarkaupum Hafnarfirði, Iceland Engihjalla, Víði Skeifunni, Samkaupum-Úrval Hafnarfirði og Hagkaupum Smáralind.
Hér er aðeins um beinan verðsamanburð að ræða, en ekki er lagt mat á gæði eða þjónustu söluaðila.
