Árleg Bókamessa í Bókmenntaborg verður haldin næstu helgi, 22.-23.nóvember, í Ráðhúsi Reykjavíkur. Þar munu íslenskir útgefendur sýna útgáfu ársins í Tjarnarsal Ráðhússins og boðið verður upp á lifandi bókmenntadagskrá um allt húsið. Bókamessan verður opin frá kl. 12 – 17 báða dagana og bókmenntadagskrá verður um allt hús frá kl. 13 – 17.
Þarna gefst lesendum því tækifæri til að kynna sér allar nýju bækurnar, spjalla við útgefendur og höfunda og njóta viðburða fyrir börn og fullorðna. Margir útgefendur selja einnig bækur á sýningarbásum sínum.
Boðið verður upp á kynningu og dagskrá tengda alls konar bókum; matreiðslubókum, barna- og unglingabókum, hannyrðabókum, fræðibókum, skáldverkum fyrir fullorðna og svo mætti lengi telja. Gestir geta fræðst um handverk, smakkað mat, kynnt sér jólabjóra og íslenska bjórsögu, tekið þátt í getraunum, skemmt sér með Orðbragðsparinu Braga og Brynju, hitt Vísinda-Villa, skoðað fjölda mynda úr alls konar nýjum bókum, hlustað á upplestur og spjall, og notið fjölbreyttrar barnadagskrár.